பாகிஸ்தான் கிரிக்கெட் வாரியம் பாகிஸ்தான் சூப்பர் லீக் என்ற டி20 கிரிக்கெட் தொடரை நடத்தி வருகிறது. இரண்டு சீசன் முடிந்த நிலையில் அடுத்த வருடம் 3-வது சீசன் நடைபெற இருக்கிறது. இந்த தொடருக்கான ஏலத்தில் கலந்து கொள்ளும் வீரர்களுக்கான வரைவு பட்டியலை பாகிஸ்தான் கிரிக்கெட் வாரியம் இன்று வெளியிட்டது.
வரைவு பட்டியலில் 500 வீரர்கள் இடம்பிடித்துள்ளனர். இதில் 200 பேர் வெளிநாட்டு வீரர்களாவார்கள். அவர்களில் வெயின் பிராவோ, இம்ரான் தாஹிர், கிறிஸ் லின், டுமினி, கார்லோஸ் பிராத்வைட், ஷேன் வாட்சன், ஜிம்மி நீஷம், மேத்யூஸ், முஸ்டாபிஜூர் ரஹ்மான், மெக்கிளேனகன், மிட்செல் ஜான்சன், கொலின் முன்றோ, லூக் ரோஞ்சி, ரஷித், வெயின் பர்னெல், திசாரா பெரேரா, ரஷித் கான், கொலின் இங்ராம் ஆகியோர் குறிப்பிடத்தகுந்தவர்கள்.
முதல் இரண்டு சீசனில் ஐந்து அணிகள் இடம்பிடித்திருந்தன. 3-வது தொடரில் முல்தான் சுல்தான் என்ற அணி புதிதாக இடம்பிடிக்க இருக்கிறது. ஒவ்வொரு அணியும் வீரர்களை ஏலம் எடுப்பதற்கு 1.2 மில்லியன் அமெரிக்க டாலர்கள் செலவிடலாம். ஒரு அணியில் 20 வீரர்கள் இடம்பிடிக்கலாம். கடந்த முறை விளையாடியதில் 9 வீரர்களை தக்கவைத்துக் கொள்ளலாம்.
