புதுடெல்லி:
இந்தியாவில் 17 வயதிற்கு உட்பட்டோருக்கான உலகக்கோப்பை கால்பந்து தொடர் நடைபெற்று வருகிறது. 5-வது நாளான நேற்று கொச்சியில் நடைபெற்ற இரண்டாவது போட்டியில் ‘டி’ பிரிவில் இடம்பிடித்துள்ள வடகொரியா - பிரேசில் அணிகள் மோதின. இரு அணிகளும் முதல் பாதியில் எந்த கோலும் அடிக்கவில்லை.
இரண்டாம் பாதி ஆட்டத்தின் 56-வது நிமிடத்தில் பிரேசிலின் லின்கன் முதல் கோல் அடித்து அவரது அணிக்கு முன்னிலை கொடுத்தார். அடுத்து 61-வது நிமிடத்தில் பிரேசில் அணியின் பாலினோ தனக்கு கிடைத்த வாய்ப்பை சரியாக பயன்படுத்தி கோலாக மாற்றினார். இதன்மூலம் பிரேசில் அணி 2-0 என முன்னிலை பெற்றது.
இருப்பினும் வடகொரியா அணியின் அனைத்து கோல் போடும் வாய்ப்பையும் பிரேசில் அணியினர் தடுத்தனர். அதனால் அந்த அணியால் இறுதிவரை எந்த கோலும் அடிக்க முடியவில்லை. இதன்மூலம் 2-0 என்ற கோல் கணக்கில் பிரேசில் அணி வெற்றி பெற்றது.
கோவாவில் நடைபெற்ற மற்றொரு போட்டியில் ‘சி’ பிரிவில் இடம்பிடித்துள்ள ஈரான், ஜெர்மனியை எதிர்கொண்டது. ஈரான் நாட்டின் வீரர்கள் வேகத்திற்கு ஜெர்மனி அணியால் ஈடுகொடுக்க முடியவில்லை.
ஈரான் அணி முதல் பாதி நேரத்தில் இரண்டு கோல்கள் அடித்தது. அந்த அணியின் யூனெஸ் டெல்ஃபி 6-வது மற்றும் 42-வது நிமிடத்தில் அடுத்தடுத்து கோல் அடித்தார். ஆட்டத்தின் 2-வது பாதி நேரத்தின் 49-வது நிமிடத்தில் ஈரானின் அலாஹ்யர் சையத் ஒரு கோல் அடித்தார். அதைத்தொடர்ந்து, ஈரானின் வாஹித் நம்தாரி 75-வது நிமிடத்தில் நான்காவது கோல் அடித்தார். இதன்மூலம் ஈரான் அணி 4-0 என ஜெர்மனி அணியை வீழ்த்தியது.
முன்னதாக நடைபெற்ற லீக் போட்டியில் ஸ்பெயின் 4-0 என நைஜர் அணியை வீழ்த்தியது. கோஸ்டா ரிகா - கினியா அணிகள் மோதிய போட்டி 2-2 என டிராவில் முடிந்தது.
இன்று (11-ம் தேதி) நடைபெறும் ‘ஈ’ பிரிவு லீக் போட்டிகளில் பிரான்ஸ் - ஜப்பான், ஹாண்டுரஸ் - நியூ கலிடோனியா அணிகளும், ‘எஃப்’ பிரிவு லீக் போட்டிகளில் இங்கிலாந்து - மெக்ஸிகோ, ஈராக் - சிலி அணிகளும் பலப்பரீட்சை செய்கின்றன.
