லா லிகா தொடரில் இடம்பிடித்துள்ள முன்னணி அணிகளில் ஒன்று ரியல் மாட்ரிட். கடந்த 2016-17 சீசனில் சாம்பியன் பட்டம் வென்று சாதனைப் படைத்தது. ஆனால் இந்த சீசனில் ரியல் மாட்ரிட் அணி இன்னும் சிறப்பான ஆட்டத்தை வெளிப்படுத்தவில்லை.
முதல் நான்கு போட்டிகளில் கிறிஸ்டியானோ ரெனால்டோ தடைக் காரணமாக பங்கேற்கவில்லை. நேற்றைய ஐந்தாவது போட்டியில் ரியல் மாட்ரிட் ரியல் பெடிஸ் அணியை எதிர்கொண்டது. இதில் ரொனால்டோ இடம்பிடித்தார். வலுவான ரியல் மாட்ரிட் அணிக்கு ரியல் பெடிஸ் அணி கடும் நெருக்கடி கொடுத்தது.
இரு அணிகளுக்கும் கோல்கள் அடிக்க பல வாய்ப்புகள் கிடைத்தது. அத்தனை வாய்ப்புகளும் வீண் போனது. இதனால் 90 நிமிடத்தில் இரு அணிகளும் கோல் அடிக்கவில்லை. காயம் மற்றும் ஆட்டம் நிறுத்தம் ஆகியவற்றிற்காக கூடுதல் நேரம் வழங்கப்பட்டது. இதன் 4-வது நிமிடத்தில், அதாவது 94-வது நிமிடத்தில் ரியல் பெடிஸ் அணியின் அண்டோனியோ சனாப்ரியா கோல் அடிக்க ரியல் பெடிஸ் 1-0 என வெற்றி பெற்றது.
இந்த சீசனில் ரியல் மாட்ரிட் தனது சொந்த மைதானத்தில் இதுவரை வெற்றி பெறாமல் இருக்கிறது. ஐந்து போட்டிகளின் முடிவில் 8 புள்ளிகளுடன் 8-வது இடத்தில் இருக்கிறது. ரியல் மாட்ரிட்டின் பரம எதிரியான பார்சிலோனா ஐந்து போட்டிகளில் வெற்றி பெற்று 15 புள்ளிகளுடன் முதல் இடத்தில் இருக்கிறது.
