டேவிஸ் கோப்பை டென்னிஸ் போட்டியில் கனடாவுக்கு எதிரான ஆட்டத்தில் இந்திய வீரர் ராம்குமார் வெற்றி பெற்றார். யுகி பாம்ப்ரி தோல்வி அடைந்தார்.
டேவிஸ் கோப்பை டென்னிஸ் போட்டியின் உலக சுற்றுக்கான ‘பிளே-ஆப்’ ஆட்டத்தில் இந்தியா-கனடா அணிகள் மோதின. இந்த ஆட்டம் கனடாவில் உள்ள எட்மண்டன் நகரில் நடந்து வருகிறது.
ஒற்றையர் பிரிவின் முதல் ஆட்டத்தில் உலக தரவரிசையில் 154-வது இடத்தில் இருக்கும் 22 வயதான ராம்குமார் ராமநாதன், 202-ம் நிலை வீரரான கனடாவின் பிராட்லீ ஸ்னூரை எதிர்கொண்டார்.
விறுவிறுப்பான இந்த ஆட்டத்தில் சென்னையை சேர்ந்த ராம்குமார் 5-7, 7-6 (7-4), 7-5, 7-5 என்ற செட் கணக்கில் பிராட்லீ ஸ்னூரை வீழ்த்தி இந்திய அணிக்கு 1-0 என்ற கணக்கில் முன்னிலை கொடுத்தார். இந்த ஆட்டம் 3 மணி 16 நிமிடம் நீடித்தது.
இந்த ஆண்டுக்கான டேவிஸ் கோப்பை போட்டியில் ராம்குமார் இதுவரை தோல்வியை சந்தித்ததில்லை. 5 ஆட்டங்களில் விளையாடிய அவர் அனைத்து போட்டிகளிலும் வெற்றி பெற்றுள்ளார்.
2-வது ஒற்றையர் ஆட்டத்தில் உலக தர வரிசையில் 157-வது இடத்தில் உள்ள யுகி பாம்ப்ரி, 51-ம் நிலை வீரரான கனடாவின் டெனிஸ் ஷபோவாலோவுடன் மோதினார். முதல் 2 செட்களையும் இழந்த யுகி பாம்ப்ரி, பின்னர் சுதாரித்து ஆடி அடுத்த 2 செட்களையும் கைப்பற்றினார். இதனால் ஆட்டம் 5-வது செட் வரை நீடித்தது. கடைசி செட்டில் ஆதிக்கம் செலுத்திய ஷபோவாலோவ் வெற்றி பெற்றார். முடிவில் யுகி பாம்ப்ரி 6-7 (2-7), 4-6, 7-6 (8-6), 6-4, 1-6 என்ற செட் கணக்கில் ஷபோவாலோவ்விடம் தோல்வியடைந்தார். இந்த ஆட்டம் 3 மணி 52 நிமிடம் நீடித்தது.
