கான்பூர்:
கான்பூரில் இன்று நடைபெற்ற ஐ.பி.எல். 20 ஓவர் கிரிக்கெட் லீக் போட்டியில் டெல்லி டேர்டெவில்ஸ் - குஜராத் லயன்ஸ் அணிகள் மோதின. டாஸ் வென்ற டெல்லி அணி முதலில் பந்துவீச்சை தேர்வு செய்தது.
குஜராத் அணியின் தொடக்க வீரர்களாக சுமித் - இஷான் கிஷான் களமிறங்கினர். தொடக்கத்தில் இருந்தே டெல்லி அணி பந்துவீச்சாளர்கள் ஆதிக்கம் செலுத்தினர். முகமது ஷமி வீசிய 4-வது ஓவரில் சுமித் 8 ரன்கள் எடுத்த நிலையில் ரன் அவுட் ஆனார். அடுத்து களமிறங்கிய கேப்டன் சுரேஷ் ரெய்னாவும் சொற்ப ரன்களில் ஆட்டமிழந்தார்.
பின்னர் இஷான் கிஷானுடன் - தினேஷ் கார்த்திக் நிதனாமாக விளையாடி அணியின் ஸ்கோரை படிப்படியாக உயர்த்தினர். குஜராத் அணியின் ஸ்கோர் 56 ரன்கள் என்ற நிலையில் இருந்தபோது, அமித் மிஸ்ரா வீசிய 7-வது ஓவரில் இஷான் கிஷான் அவுட் ஆனார். அவர் 25 பந்தில் 34 ரன்கள் (5 பவுண்டரி, 1 சிக்சர்) எடுத்தார்.
அடுத்து களமிறங்கிய பிஞ்ச் - தினேஷ் கார்த்திக்குடன் சேர்ந்து அதிரடியாக விளையாடினர். குஜராத் அணி 17-வது ஓவரில் 148 ரன்கள் எடுத்திருந்த நிலையில் தினேஷ் கார்த்திக் 40 ரன்னில் பிராத்வெயிட் பந்தில் அவுட் ஆனார். அடுத்து ரவீந்திர ஜடேஜா களமிறங்கினார். இதே ஓவரின் அடுத்த பந்தில் ஆரோன் பிஞ்ச் சிக்சர் அடித்து அரை சதம் அடித்தார்.
20 ஓவர் முடிவில் குஜராத் அணி 5 விக்கெட் இழப்புக்கு 195 ரன்கள் குவித்தது. இதையடுத்து 196 ரன்கள் எடுத்தால் வெற்றி என்ற இலக்குடன் டெல்லி அணி களமிறங்கியது. துவக்க வீரர்களான எஸ்.வி. சாம்சன் (10), கே.கே. நாயர் (30) ரன்களை குவித்து ஆட்டமிழந்தனர். பின் களமிறங்கிய ஆர்.ஆர். பேண்ட் 4 ரன்களில் ஆட்டமிழக்க எஸ்.எஸ். ஐயர் களமிறங்கினார்.
துவக்கம் முதலே அதிரடி ஆட்டத்தை வெளிப்படுத்திய எஸ்.எஸ். ஐயர் 57 பந்துகளில் 96 ரன்களை குவித்து ஆட்டமிழந்தார். இறுதியில் ஷமி 4 ரன்களுடனும், அமித் மிஸ்ரா 8 ரன்களுடன் ஆட்டமிழக்காமல் களத்தில் இருந்தனர். டெல்லி டேர்டெவில்ஸ் அணி 19.4 ஓவர்களில் 8 விக்கெட் இழப்பிற்கு 197 ரன்களை குவித்து வெற்றி பெற்றது.
