கொல்கத்தா ஈடன் கார்டனில் நேற்று நடைபெற்ற போட்டியில் டெல்லி டேர்டெவில்ஸ் அணியை 7 விக்கெட் வித்தியாசத்தில் வீழ்த்தியது கொல்கத்தா நைட் ரைடர்ஸ். இந்த தோல்வியின் மூலம் இந்த தொடரில் டெல்லி டேர்டெவில்ஸ் அணி தொடர்ந்து நான்கு தோல்விகளை சந்தித்துள்ளது.
தற்போதைய சூழ்நிலையில் டெல்லி டேர்டெவில்ஸ் அணி 7 போட்டிகளில் 2-ல் மட்டுமே வெற்றி பெற்று நான்கு புள்ளிகளுடன் கடைசி இடத்தில் உள்ளது. மீதமுள்ள 7 போட்டியில் ஏறக்குறைய 6 போட்டிகளில் வெற்றி பெற்றால்தான் டெல்லி அணியால் பிளேஆஃப் சுற்றுக்கு முன்னேற முடியும்.
ஆனால், தொடர் தோல்வியில் இருந்து தங்களால் மீள முடியும் என்று, ஐதராபாத்திற்கு எதிரான போட்டியில் டெல்லி அணி சார்பில் 38 பந்தில் 60 ரன்கள் குவித்த சஞ்சு சாம்சன் கூறியுள்ளார்.
இதுகுறித்து சஞ்சு சாம்சன் கூறுகையில் ‘‘கிரிக்கெட் போன்ற விளையாட்டில், வெற்றியை விட தோல்விகள் அதிக அளவில் இருக்கும். விளையாட்டு வீரர்கள் என்ற அடிப்படையில், தோல்வியில் இருந்து எப்படி மீள வேண்டும் என்று நமக்கெல்லாம் தெரியும். இதே எண்ணத்தில் தொடர்ந்து செல்ல வேண்டியது அவசியம்.
வாழ்க்கையிலும் ஏராளமான தோல்விகள் ஏற்படும். ஆனால், நமக்கும் நம்பிக்கை தேவை. நாம் நேர்மறையான மனநிலையுடன் செல்ல வேண்டும். நமக்குள்ளாகவே சவால்களை ஏற்றுக்கொண்டு, நேர்மறையான திசையை நோக்கி முன்னேற வேண்டும்’’ என்றார்.
