ஐ.பி.எல். தொடரின் இன்றைய போட்டியில் குஜராத் லயன்ஸ் அணியை 21 ரன்கள் வித்தியாசத்தில் வீழ்த்தி பெங்களூரு ராயல் சேலஞ்சர்ஸ் அணி வெற்றி பெற்றது.
ராஜ்கோட்டில் நடைபெற்ற போட்டியில் டாஸ் வென்ற குஜராத் அணி பீல்டிங்கை தேர்வு செய்தது. இதையடுத்து தொடக்க வீரர்களாக கிறிஸ் கெய்ல் - விராட் கோலி களமிறங்கினர். இருவருமே அதிரடி காட்டி விளையாட அணியின் ஸ்கோர் மளமளவென உயர்ந்தது. முதல் விக்கெட்டுக்கு 122 ரன்கள் சேர்த்திருந்த போது கெய்ல், பாசில் பந்துவீச்சில் எல்.பி.டபிள்யூ ஆனார். அவர் 38 பந்துகளில் 5 பவுண்டரி, 7 சிக்சர்கள் விளாசி 77 ரன்கள் சேர்த்தார். மேலும் டி20 போட்டிகளில் 10,000 ரன்களை கடந்து கெய்ல் புதிய சாதனையும் படைத்திருந்தார்.
இதையடுத்து கேப்டன் கோலி 50 பந்துகளில் 7 பவுண்டரி, 1 சிக்சர் என 64 ரன்களும், ஹெட் 30 (16) ரன்களும், ஜாதவ் 38 (16) ரன்களும் எடுத்து களத்தில் இருந்தனர். இறுதியில் அந்த அணி 20 ஓவர்கள் முடிவில் 2 விக்கெட்டுகளை இழந்து 213 ரன்களை எடுத்தது.
214 ரன்கள் எடுத்தால் வெற்றி என களமிறங்கிய குஜராத் அணியின் தொடக்க வீரர் ஸ்மித் 1 ரன்னில் வெளியேறினார். மறுபுறத்தில் மிக்கல்லம் அதிரடியாக விளையாடி அணியின் ஸ்கோரை உயர்த்தினார். அவருடன் ஜோடி சேர்ந்த கேப்டன் ரெய்னா 8 பந்துகளில் 2 புண்டரி, 2 சிக்சர் என 23 ரன்கள் எடுத்து அவுட்டானார். இதையடுத்து, பின்ச் 19 (15), டி கார்த்திக் 1 (4), ஜடேஜா 23 (22) ரன்களும் எடுத்து வெளியேற குஜராத் அணி தடுமாறியது.
எனினும் அந்த அணியின் கிஷான் 16 பந்துகளில் 2 பவுண்டரி, 4 சிக்சர்கள் என 39 ரன்கள் எடுத்து வெளியேறினார். பெங்களூரு சார்பில் சஹால் 3 விக்கெட்டுகளை வீழ்த்தினார். 20 ஓவர்கள் முடிவில் 7 விக்கெட்டுகளை இழந்து 192 ரன்கள் எடுத்து குஜராத் வெற்றி வாய்ப்பை இழந்தது. ராயல் சேலஞ்சர்ஸ் பெங்களூரு அணி 21 ரன்கள் வித்தியாசத்தில் வெற்றி பெற்றது.
