இந்திய அணி டெஸ்ட் போட்டியில் தொடர்ந்து ஆதிக்கம் செலுத்தி வருவதற்கு சுழற்பந்து ஜாம்பவான்களான அஸ்வின், ஜடேஜாவின் அபாரமான பந்து வீச்சே காரணம்.
இந்த சீசனில் (2016-17) இந்திய அணி தொடர்ச்சியாக 4 டெஸ்ட் தொடரை (நியூசிலாந்து, இங்கிலாந்து, வங்காளதேசம், ஆஸ்திரேலியா) கைப்பற்றி உள்ளது. அதாவது 13 டெஸ்டில் 10-ல் வெற்றி பெற்றது. 2 டெஸ்ட் டிரா ஆனது. ஒரு டெஸ்டில் தோற்றது. ஒட்டு மொத்தத்தில் தொடர்ச்சியாக 7 டெஸ்ட் தொடரை வென்று விராட் கோலியின் அணி முத்திரை பதித்தது.
2016-17 சீசனில் அஸ்வினும், ஜடேஜாவும் இணைந்து 13 டெஸ்டில் மொத்தம் 153 விக்கெட்டுகளை வீழ்த்தி இந்தியாவின் வெற்றிக்கு பெரும் பங்காற்றினர்.
இதில் அஸ்வின் 82 விக்கெட் கைப்பற்றினார். ஒரு இன்னிங்சில் 7 முறை 5 விக்கெட்டக்கு மேல் எடுத்தார். 10 விக்கெட்டுக்கும் மேல் 3 தடவை கைப்பற்றினார். 59 ரன் கொடுத்து 7 விக்கெட் வீழ்த்தியது அவரது சிறந்த பந்து வீச்சாகும். ஜடேஜா 13 டெஸ்டில் 71 விக்கெட் கைப்பற்றி உள்ளார். 4 முறை 5 விக்கெட்டுக்கு மேலும் (இன்னிங்ஸ்) 1 தடவை 10 விக்கெட்டுக்கு அதிகமாகவும் (இரண்டு இன்னிங்ஸ் சேர்த்து) எடுத்தார். 48 ரன் கொடுத்து 7 விக்கெட் வீழ்த்தியதே அவரது சிறந்த பந்து வீச்சாகும்.
சமீப காலமாக அஸ்வினை விட ஜடேஜாவின் பந்து வீச்சில் மிகுந்த முன்னேற்றம் காண முடிகிறது. கடைசி 6 டெஸ்டில் அஸ்வின் 28 விக்கெட்தான் கைப்பற்றினார். ஆனால் ஜடேஜாவுக்கு 41 விக்கெட் கிடைத்தது. ஆஸ்திரேலியா தொடரில் ஜடேஜா மிகவும் சிறப்பாக செயல்பட்டு தொடர் நாயகன் விருதை பெற்றார். அவர் 4 டெஸ்டில் 25 விக்கெட் வீழ்த்தினார். ஆனால் அஸ்வின் 21 விக்கெட்தான் கைப்பற்றினார்.
அஸ்வின் - ஜடேஜாவின் ஆதிக்கத்தால் இந்திய அணி டெஸ்ட் அரங்கில் தொடர்ந்து தலைநிமிர்ந்து நிற்கிறது. உள்ளூர் மைதானங்களில் தொடர்ந்து சிறப்பாக பந்துவீசி வரும் இந்த ஜோடி இனி வரும் காலங்களிலும் தொடர்ந்து ஆதிக்கம் செலுத்தி இந்தியாவுக்கு மேலும் பெருமை சேர்க்கும் என்று எதிர்பார்க்கப்படுகிறது.
