தென்ஆப்பிரிக்கா அணியின் விக்கெட் கீப்பராக செயல்பட்டு வருபவர் குயிண்டான் டி காக். சிறந்த அதிரடி பேட்ஸ்மேனான டி காக் தற்போது நியூசிலாந்துக்கு எதிரான டெஸ்ட் தொடரில் விளையாடி வருகிறார்.
இரு அணிகளுக்கு இடையிலான கடைசி டெஸ்ட் போட்டி நாளை தொடங்குகிறது. இந்த போட்டியில் டிரா அல்லது வெற்றி பெற்றால் தென்ஆப்பிரிக்கா தொடரை கைப்பற்றிவிடும். இதற்காக தென்ஆப்பிரிக்கா வீரர்கள் கடுமையான பயிற்சியில் ஈடுபட்டு வருகிறார்.
இந்நிலையில் குயிண்டான் டி காக்கிற்கு காயம் ஏற்பட்டது. கைவிரலில் ஏற்பட்ட காயத்தால் அவர் அவதிப்பட்டு வருகிறார். நியூசிலாந்திற்கு எதிரான கடைசி போட்டியில் கலந்து கொண்டால் ஐ.பி.எல். தொடரில் கலந்து கொள்ள முடியாது. ஐ.பி.எல். தொடரில் கலந்து கொண்டால் இங்கிலாந்தில் நடைபெற இருக்கும் சாம்பியன்ஸ் டிராபி தொடரில் கலந்து கொள்ள முடியாது என்ற நிலைமை ஏற்பட்டது.
மேலும், நியூசிலாந்திற்கு எதிரான கடைசி போட்டியில் கலந்து கொள்ளவில்லை என்றால், ஏப்ரல் ஐந்தாம் தேதி நடைபெற இருக்கும் ஐ.பி.எல். தொடரில் கலந்து கொள்ள வாய்ப்புள்ளது என்று கூறப்பட்டது.
ஆனால், முக்கியத்துவம் வாய்ந்த நியூசிலாந்திற்கு எதிரான நாளைய போட்டியில் அவர் கலந்து கொள்வார் என்று தென்ஆப்பிரிக்கா கிரிக்கெட் வாரியம் தெரிவித்தது. இதனால் அவர் ஐ.பி.எல். தொடரில் இருந்து விலகுவதாக தெரிவித்துள்ளார்.
தொடக்க வீரராக களம் இறங்கும் டி காக் ஐ.பி.எல். தொடரில் இருந்து விலகியிருப்பது எங்களுக்கு பெரிய இழப்பு என்று டெல்லி டேர்டெவில்ஸ் அணி தெரிவித்துள்ளது. இவர் கடந்த ஐ.பி.எல். தொடரில் 13 போட்டியில் 445 ரன்கள் குவித்தார் என்பது குறிப்பிடத்தக்கது.
ஏற்கனவே டெல்லி அணியில் இருந்து தென்ஆப்பிரிக்காவின் டுமினி சொந்த காரணமாக விலகியுள்ளார். தற்போது டி காக் விலகியுள்ளார் என்பது குறிப்பிடத்தக்கது.
