சென்னை :
சையத் முஸ்தாக் அலி கோப்பைக்கான 20 ஓவர் கிரிக்கெட் போட்டி மண்டலங்கள் வாரியாக நடந்து வருகிறது. சென்னையில் நடைபெற்ற தென் மண்டல 20 ஓவர் கிரிக்கெட் போட்டியில் 6 அணிகள் கலந்து கொண்டு லீக் முறையில் மோதின.
இதில் நேற்று நடந்த கடைசி லீக் ஆட்டம் ஒன்றில் தமிழ்நாடு-கேரளா அணிகள் மோதின. ‘டாஸ்’ ஜெயித்து முதலில் பேட்டிங் செய்த கேரள அணி நிர்ணயிக்கப்பட்ட 20 ஓவர்களில் 6 விக்கெட் இழப்புக்கு 128 ரன்கள் எடுத்தது. அதிகபட்சமாக கேப்டன் சச்சின் பேபி ஆட்டம் இழக்காமல் 53 ரன்கள் சேர்த்தார். தமிழக அணி தரப்பில் அஸ்வின் கிறிஸ்ட் 3 விக்கெட்டும், ஆர்.சதீஷ் 2 விக்கெட்டும், ரஹில் ஷா ஒரு விக்கெட்டும் கைப்பற்றினார்கள்.
பின்னர் 129 ரன்கள் எடுத்தால் வெற்றி என்ற இலக்குடன் ஆடிய தமிழக அணி 18.4 ஓவர்களில் 5 விக்கெட் இழப்புக்கு 129 ரன்கள் எடுத்து 5 விக்கெட் வித்தியாசத்தில் வெற்றி பெற்றது. அதிகபட்சமாக பாபா அபராஜித் 39 பந்துகளில் 2 பவுண்டரி, 2 சிக்சருடன் 51 ரன்கள் எடுத்து ஆட்டம் இழக்காமல் இருந்தார்.
மற்றொரு லீக் ஆட்டத்தில் கர்நாடகா அணி 6 விக்கெட் வித்தியாசத்தில் கோவாவை தோற்கடித்தது. இன்னொரு லீக் ஆட்டத்தில் ஆந்திர அணி 11 ரன் வித்தியாசத்தில் ஐதராபாத்தை வீழ்த்தியது.
லீக் ஆட்டங்கள் முடிவில் 5 ஆட்டங்களில் ஆடிய கர்நாடகா, தமிழ்நாடு அணிகள் முறையே தலா 4 வெற்றி, ஒரு தோல்வியுடன் 16 புள்ளிகள் பெற்றன. ரன்ரேட் அடிப்படையில் முன்னிலை பெற்ற கர்நாடகா அணி (ரன்ரேட் +1.363) சாம்பியன் பட்டத்தை கைப்பற்றியது. தமிழக அணி (ரன்ரேட் +0.314) 2-வது இடம் பெற்றது. சாம்பியன் பட்டம் வென்ற கர்நாடகா அணி அகில இந்திய போட்டிக்கு தகுதி பெற்றது. ஐதராபாத் அணி (3 வெற்றி, 2 தோல்வி) 3-வது இடத்தையும், கேரளா (2 வெற்றி, 3 தோல்வி) 4-வது இடத்தையும், ஆந்திரா (2 வெற்றி, 3 தோல்வி) 5-வது இடத்தையும், கோவா (5 ஆட்டத்திலும் தோல்வி) கடைசி இடமும் பிடித்தன.
