டாக்கா :
வங்காளதேசத்துக்கு சென்றுள்ள இங்கிலாந்து கிரிக்கெட் அணி 2 போட்டி கொண்ட டெஸ்ட் தொடரில் பங்கேற்றுள்ளது. சிட்டகாங்கில் நடந்த முதலாவது டெஸ்டில் இங்கிலாந்து 22 ரன்கள் வித்தியாசத்தில் போராடி வெற்றி கண்டது.
இந்த நிலையில் இவ்விரு அணிகள் இடையிலான 2-வது மற்றும் கடைசி டெஸ்ட் போட்டி டாக்காவில் உள்ள மிர்புரில் இன்று (வெள்ளிக்கிழமை) தொடங்குகிறது. இங்கிலாந்துக்கு எதிராக இதுவரை டெஸ்டில் வெற்றி பெறாத வங்காளதேச அணி, அந்த நிலைமையை மாற்றி வரலாறு படைக்கும் முனைப்புடன் ஆயத்தமாகியுள்ளது.
அதே சமயம் இந்த டெஸ்டிலும் வாகை சூடி, நல்ல நம்பிக்கையுடன் அடுத்து வரும் இந்தியப் பயணத்தை மேற்கொள்ள வேண்டும் என்ற வேட்கையில் இங்கிலாந்து வீரர்கள் இருக்கிறார்கள். இங்கிலாந்து அணியில் இரு மாற்றம் செய்யப்படுகிறது. காரெத் பேட்டிக்கு பதிலாக 24 வயதான இடக்கை சுழற்பந்து வீச்சாளர் ஜாபர் அன்சாரி அறிமுக வீரராக அடியெடுத்து வைக்கிறார். ஸ்டூவர்ட் பிராட்டுக்கு ஓய்வு அளிக்கப்பட்டு, ஸ்டீவன் பின் இடம் பெறுகிறார்.
இந்த டெஸ்ட் மழையால் பாதிக்கப்படலாம். டாக்காவில் நேற்று கனமழை பெய்தது. இன்றும் இடியுடன் கூடிய மழை பெய்ய வாய்ப்பிருப்பதாக அங்குள்ள வானிலை ஆய்வு மையத் தகவல்கள் தெரிவிக்கின்றன. காலை 9.30 மணிக்கு தொடங்கும் இந்த போட்டியை ஸ்டார் ஸ்போர்ட்ஸ்2 சேனல் நேரடி ஒளிபரப்பு செய்கிறது.
