இந்தியாவின் முன்னணி டென்னிஸ் வீராங்கனையான சானியா மிர்சா சுவிட்சர்லாந்து வீராங்கனை மார்ட்டினா ஹிங்கிஸ் உடன் இணைந்து விளையாடி வந்தார். சமீபத்தில் ஹிங்கிஸ் உடனான பார்ட்னர்ஷிப்பை முறித்துக் கொண்ட சானியா, செக் குடியரசின் பார்போரா ஸ்ட்ரைகோவா உடன் இணைந்து விளையாடி வருகிறார்.
இந்த ஜோடி தற்போது வூவான் ஒபன் டென்னிஸ் தொடரில் பங்கேற்று வருகிறது. இன்று நடைபெற்ற காலிறுதி ஒன்றில் கஜகஜஸ்தானின் ஷ்வெடோவா - ஹங்கேரியின் டிமேயா பாபோஸ் ஜோடியை சானியா ஜோடி எதிர்கொண்டது.
பெண்கள் இரட்டையர் பிரிவில் முதல் இடத்தில் இருக்கும் சானியா ஜோடி, இந்த ஆட்டத்தில் எதிர் ஜோடியை முதல் செட்டில் 6-3 என எளிதில் வீழ்த்தியது. ஆனால், 2-வது செட்டில் கஜகஜஸ்தான்- ஹங்கேரி ஜோடி சானியா ஜோடிக்கு கடும் நெருக்கடி கொடுத்தது. இதனால் டை பிரேக்கர் வரை சென்றது. இறுதியில் சானியா ஜோடி 7(7) - 6(5) என்ற நேர்செட் கணக்கில் வெற்றி பெற்றது. இதன்மூலம் 2-0 என வெற்றி பெற்று அரையிறுதிக்கு முன்னேறியது.
