பான் பசிபிக் ஓபன் டென்னிஸ்: வோஸ்னியாக்கி இறுதிப் போட்டிக்கு தகுதி

ஜப்பான் தலைநகர் டோக்கியோவில் பான் பசிபிக் ஓபன் டென்னிஸ் தொடர் நடைபெற்று வருகிறது. இன்று பெண்கள் ஒற்றையர் பிரிவின் அரையிறுதி ஆட்டங்கள் நடைபெறுகின்றன.

ஒரு அரையிறுதியில் கரோலின் வோஸ்னியாக்கி - ரட்வன்ஸ்கா ஆகியோர் பலப்பரீட்சை நடத்தினார்கள். இதில் முதல் செட்டை 4-6 என இழந்த வோஸ்னியாக்கி, 2-வது செட்டை 7-5 எனவும், 3-வது செட்டை 6-4 எனவும் கைப்பற்றினார்.

இதனால் 2-1 என வெற்றி பெற்று இறுதிப் போட்டிக்கு முன்னேறினார். சமீபத்தில் முடிவடைந்த அமெரிக்க ஓபனில் வோஸ்னியாக்கி அரையிறுதி வரை முன்னேறினார் என்பது குறிப்பிடத்தக்கது.

மற்றொரு அரையிறுதி போட்டியில் உள்ளூர் வீராங்கனை ஒசாகா, ஸ்விடோலினாவை எதிர்கொள்கிறார். இதில் வெற்றிபெறும் வீராங்கனையுடன் வோஸ்னியாக்கி இறுதிப் போட்டியில் மோதுவார்.