500-வது டெஸ்டில் அடியெடுத்து வைக்கும் இந்தியா: ருசிகர தகவல்கள்

கான்பூர் :

இந்தியா- நியூசிலாந்து அணிகள் இடையிலான முதலாவது டெஸ்ட் கிரிக்கெட் போட்டி கான்பூரில் உள்ள கிரீன்பார்கில் நாளை (வியாழக்கிழமை) தொடங்குகிறது. இது இந்திய அணியின் 500-வது டெஸ்ட் போட்டியாகும். 1932-ம் ஆண்டில் சர்வதேச கிரிக்கெட் பயணத்தை தொடங்கிய இந்திய அணி இந்த 84 ஆண்டு கால டெஸ்ட் வரலாற்றில் சிகரத்தையும் தொட்டு இருக்கிறது. அதல வீழ்ச்சியையும் சந்தித்து இருக்கிறது.

டெஸ்டில் இந்தியாவின் சாதனைகள், முக்கிய நிகழ்வுகள் போன்ற சுவாரஸ்யமான விஷயங்களை இங்கு பார்க்கலாம்.

* 1932-ம் ஆண்டு முதல் முறையாக இந்திய அணி டெஸ்டில் அடியெடுத்து வைத்தது. ‘கிரிக்கெட்டின் மெக்கா’ என்று அழைக்கப்படும் லண்டன் லார்ட்சில் இங்கிலாந்துக்கு எதிராக அரங்கேறிய இந்த டெஸ்டில், சி.கே.நாயுடு தலைமையிலான இந்திய அணி 158 ரன்கள் வித்தியாசத்தில் தோல்வி அடைந்தது. இது 3 நாட்கள் கொண்ட போட்டியாக நடத்தப்பட்டது. இடையில் ஒரு நாள் ஓய்வும் வழங்கப்பட்டது.

* இங்கிலாந்து, ஆஸ்திரேலியா, வெஸ்ட் இண்டீஸ் ஆகிய அணிகள் ஏற்கனவே இந்த மைல்கல்லை கடந்துள்ளன. இங்கிலாந்து தனது 500-வது டெஸ்டில் பாகிஸ்தானுக்கு எதிராக (1974-ம் ஆண்டு) விளையாடியது. இதில் 87 ரன்கள் இலக்கை நோக்கி இங்கிலாந்து களம் இறங்க இருந்த நிலையில் கடைசி நாள் ஆட்டம் மழையால் கைவிடப்பட்டதால் இந்த டெஸ்ட் டிராவில் முடிந்தது. ஆஸ்திரேலிய அணி 500-வது டெஸ்டில் தனது பிரதான எதிரி இங்கிலாந்தை (1990-ம் ஆண்டு, மெல்போர்ன்) 8 விக்கெட் வித்தியாசத்தில் துவம்சம் செய்தது. வெஸ்ட் இண்டீஸ் அணி 2014-ம் ஆண்டு வங்காளதேசத்தை வீழ்த்தி தனது 500-வது டெஸ்டை வெற்றியோடு கொண்டாடியது.

* இந்திய அணியில் இதுவரை 285 வீரர்கள் டெஸ்ட் கிரிக்கெட்டில் விளையாடி இருக்கிறார்கள். இதில் 32 பேர் கேப்டன் பதவியையும் அலங்கரித்து உள்ளனர்.

* 77 இந்தியர்கள் சதம் அடித்து இருக்கிறார்கள். ஜாம்பவான் சச்சின் தெண்டுல்கர் 51 சதங்கள் விளாசியதே, உலக அளவில் டெஸ்டில் ஒரு வீரரின் அதிகபட்ச சதங்கள் ஆகும்.

* லாலா அமர்நாத் சதம் அடித்த முதல் இந்தியர் (118 ரன்கள், 1933-ம் ஆண்டு இங்கிலாந்துக்கு எதிராக) ஆவார்.

* இந்திய அளவில் முச்சதம் அடித்த ஒரே வீரர் ஷேவாக் தான். அவர் இரண்டு முறை (309 ரன், பாகிஸ்தானுக்கு எதிராக, 319 ரன், தென்ஆப்பிரிக்காவுக்கு எதிராக) 300 ரன்களுக்கு மேல் குவித்து வியக்க வைத்துள்ளார்.

* பங்கேற்ற போட்டிகளின் எண்ணிக்கையில் ‘இரட்டை செஞ்சுரி’ அடித்த ஒரே வீரர் தெண்டுல்கர் ஆவார். 2013-ம் ஆண்டு வெஸ்ட் இண்டீசுக்கு எதிராக தனது 200-வது டெஸ்டுடன் தெண்டுல்கர் விடைபெற்றது நினைவு கூரத்தக்கது.

* டெஸ்டில் ஒட்டுமொத்தமாக அதிக ரன்கள் குவித்தவர் சாதனையும் இந்தியர் வசமே உள்ளது. தெண்டுல்கர் 15,921 ரன்களுடன் முதலிடம் வகிக்கிறார்.

* 1999-ம் ஆண்டு டெல்லியில் நடந்த பாகிஸ்தானுக்கு எதிரான டெஸ்டில் 2-வது இன்னிங்சில், சுழற்பந்து வீச்சில் மாயாஜாலம் காட்டிய இந்திய வீரர் அனில் கும்பிளே 10 விக்கெட்டுகளையும் கைப்பற்றி சர்வதேச அரங்கில் அனைவரது கவனத்தையும் ஈர்த்தார். 139 ஆண்டுகால டெஸ்ட் வரலாற்றில் ஒரு இன்னிங்சில் 10 விக்கெட்டுகளையும் அறுவடை செய்த 2-வது வீரர் கும்பிளே ஆவார்.

* இந்தியா தரப்பில் அதிகபட்சமாக கும்பிளே 619 விக்கெட்டுகள் (132 டெஸ்ட்) வீழ்த்தியுள்ளார். ஒட்டுமொத்த பட்டியலில் 3-வது இடம் வகிக்கிறார்.

* முதலாவது வெற்றிக்காக இந்திய அணி 20 ஆண்டுகள் காத்திருக்க வேண்டி இருந்தது. 1952-ம் ஆண்டு விஜய் ஹசாரே தலைமையிலான இந்திய அணி சென்னை சேப்பாக்கம் எம்.ஏ.சிதம்பரம் ஸ்டேடியத்தில் இங்கிலாந்துடன் மோதியது. இதில் இந்தியா இன்னிங்ஸ் மற்றும் 8 ரன்கள் வித்தியாசத்தில் வெற்றியை ருசித்தது. பங்கஜ் ராய், பாலி உம்ரிகரின் சதங்களும், சுழற்பந்து வீச்சாளர் வினோ மன்கட்டின் 12 விக்கெட்டுகளும் வரலாற்று சிறப்புமிக்க இந்த வெற்றிக்கு அச்சாரமாக அமைந்தன.

* 2007-ம் ஆண்டு வங்காளதேசத்துக்கு எதிராக இன்னிங்ஸ் மற்றும் 239 ரன்கள் வித்தியாசத்தில் பெற்ற வெற்றியே இந்தியாவின் இமாலய வெற்றியாகும். ரன் வித்தியாசத்தை எடுத்துக் கொண்டால் கடந்த ஆண்டு டெல்லியில் நடந்த தென்ஆப்பிரிக்காவுக்கு எதிரான போட்டியில் 337 ரன்கள் வித்தியாசத்தில் கிடைத்த வெற்றி சிறந்ததாகும். 7 முறை 10 விக்கெட் வித்தியாசத்தில் பெற்ற வெற்றிகளும் குறிப்பிடத்தக்கவை.

* 1952-ம் ஆண்டு பாகிஸ்தான் அணி இந்தியாவுக்கு வந்து 5 டெஸ்டில் பங்கேற்றது. 2-1 என்ற கணக்கில் இந்தியா தொடரை கைப்பற்றியது. இந்தியாவின் முதல் தொடர் வெற்றி இதுவாகும்.

* 1968-ம் ஆண்டு நியூசிலாந்துக்கு சென்ற இந்திய அணி டுனிடனில் நடந்த டெஸ்டில் நியூசிலாந்தை 5 விக்கெட் வித்தியாசத்தில் சாய்த்தது. வெளிநாட்டு மண்ணில் இந்தியாவின் முதல் வெற்றியாக இது பதிவானது. இந்த தொடரையும் 3-1 என்ற கணக்கில் இந்தியா வென்று வரலாறு படைத்தது.

* இந்திய கிரிக்கெட்டில், முத்தாய்ப்பாக 2001-ம் ஆண்டு கொல்கத்தா டெஸ்ட் வெற்றியை கூற முடியும். ஆஸ்திரேலியாவுக்கு எதிரான அந்த டெஸ்டில் சவுரவ் கங்குலி தலைமையிலான இந்திய அணி ‘பாலோ-ஆன்’ ஆகி 274 பின்தங்கிய நிலையில் 2-வது இன்னிங்சை விளையாடியது. வி.வி.எஸ்.லட்சுமண் (281 ரன்), ராகுல் டிராவிட் (180 ரன்) ஆகியோரின் பிரமாதமான ஆட்டத்தால் இந்தியா 657 ரன்கள் சேர்த்தது. அடுத்து 384 ரன்கள் இலக்கை நோக்கி களம் கண்ட ஆஸ்திரேலியா 212 ரன்னில் சுருண்டு தோற்றது. ‘பாலோ-ஆன்’ ஆகி அதன் பிறகு ஒரு அணி எழுச்சி பெற்று வெற்றி காண்பது இது 3-வது அரிய நிகழ்வாகும். முன்னதாக முதல் இன்னிங்சில் ‘ஹாட்ரிக்’ விக்கெட் வீழ்த்திய முதல் இந்திய டெஸ்ட் வீரர் என்ற சாதனையை ஹர்பஜன்சிங் படைத்தார். தொடர்ந்து 16 டெஸ்டுகளில் வெற்றி பெற்றிருந்த ஆஸ்திரேலியாவின் ஆதிக்கத்திற்கும் இதன் மூலம் இந்தியா முடிவு கட்டியது.

* இந்த நாள் வரைக்கும் ஆஸ்திரேலியா மற்றும் தென்ஆப்பிரிக்க மண்ணில் மட்டும் இந்திய அணி டெஸ்ட் தொடரை வென்றதில்லை.

* 2009-ம் ஆண்டு மும்பையில் நடந்த இலங்கைக்கு எதிரான டெஸ்டில் 9 விக்கெட்டுக்கு 726 ரன்களுடன் டிக்ளேர் செய்தது இந்தியாவின் அதிகபட்ச ஸ்கோராகும். 1974-ம் ஆண்டு லார்ட்சில் இங்கிலாந்துக்கு எதிராக 42 ரன்களில் சுருண்டது மோசமான ஸ்கோராகும்.

* இந்தியாவின் வெற்றிகரமான கேப்டனாக வலம் வந்த டோனி 60 டெஸ்டுகளில் (27 வெற்றி, 18 தோல்வி, 15 டிரா) அணியை வழிநடத்தி இருக்கிறார்.

* அதிக கேட்ச் செய்த பீல்டர் என்ற பெருமையை இந்தியாவின் ராகுல் டிராவிட் (210 கேட்ச்) தக்க வைத்துள்ளார். 

இந்திய அணியின் 500-வது டெஸ்ட் போட்டி, நினைவில் நிலைத்து நிற்கும் வகையில் அமைய வேண்டும் என்பதற்காக இந்திய கிரிக்கெட் வாரியம் பல சிறப்பு ஏற்பாடுகளை செய்துள்ளது.

* போட்டியின் போது, இந்திய முன்னாள் டெஸ்ட் கேப்டன்கள் அழைத்து கவுரவிக்கப்படுகிறார்கள். இந்திய பெண்கள் கிரிக்கெட் அணியின் கேப்டன்களுக்கும் அழைப்பு விடுக்கப்பட்டுள்ளது.

* டாஸ் போடுவதற்கு விசேஷமாக தயாரிக்கப்பட்ட வெள்ளி நாணயம் பயன்படுத்தப்படுகிறது.

* வீரர்கள் தங்கும் ஓட்டலில் 500 வகையான உணவு வகைகள் பரிமாறப்படுகிறது.

* ‘இந்திய டெஸ்ட் கனவு அணி’யை தேர்வு செய்ய கிரிக்கெட் வாரியம் பேஸ்புக் வாயிலாக ஓட்டெடுப்பு நடத்துகிறது. அதாவது இதுவரை இந்திய அணி விளையாடிய டெஸ்டுகளில் இருந்து சிறந்த 11 பேரை தேர்வு செய்ய வேண்டும். ரசிகர்கள் ஆர்வமுடன் வாக்களித்து வருகிறார்கள்.

* இந்த 500-வது டெஸ்ட் போட்டியை பார்க்க தினமும், 2 ஆயிரம் ஏழை மாணவ-மாணவிகளுக்கு அனுமதி வழங்கப்படுகிறது. அவர்களுக்கு கொடுக்கப்படும் பனியன்களில் ‘500-வது டெஸ்ட்’ என்று பொறிக்கப்பட்டிருக்கும்.