கிராண்ட் ஸ்லாம் தொடரில் ஒன்றான அமெரிக்க ஓபன் விரைவில் நடைபெற இருக்கிறது. இதற்கான தகுதிச் சுற்றுகள் நடைபெற்று வருகிறது. ஆண்களுக்கான ஒற்றையர் பிரிவில், தரவரிசையில் 143-வது இடத்தில் இருக்கும் இந்திய வீரரான சாகெத் மைனேனி முதல் இரண்டு தகுதிச் சுற்றுகளில் வெற்றி பெற்று 3-வது சுற்றுக்கு முன்னேறினார்.
3-வது சுற்றில் வெற்றி பெற்றால் அமெரிக்க ஓபனுக்கான பிரதானச் சுற்றுக்கு முன்னேறி விடலாம் என்ற நிலையில், 3-வது தகுதிச் சுற்றில் செர்பியா வீரர் பெட்ஜா கிரிஸ்டனை எதிர்கொண்டார். இதில் சாகெத் 6-3, 6-0 என நேர்செட் கணக்கில் வெற்றி பெற்றார்.
இதன்மூலம் அமெரிக்க ஓபனுக்கான பிரதானச் சுற்றுக்கு முன்னேறினார். இதன்மூலம் கிராண்ட்ஸ்லாம் போட்டிகளில் ஆண்களுக்கான ஒற்றையர் பிரிவில் முதல்முறையாக பிரதான சுற்றுக்கு முன்னேறி அசத்தினார்.
சாகெத் அமெரிக்க ஓபன் தொடரில் 2-வது சுற்றுக்கு முன்னேறினால் உலகத் தரவரிசையில் முதல் இடத்தில் இருக்கும் நோவக் ஜோகோவிக்குடன் மோதுவார்.
இதற்கு முன் 2015-ம் ஆண்டு ஆஸ்திரேலிய ஓபனில் பாம்ரி முதன்மை சுற்றுக்கு முன்னேறினார். ஆனால், முதல் சுற்றில் ஆண்டி முர்ரேயுடன் மோதி தோல்வியடைந்தார்.
