ஆமதாபாத்:
182 தொகுதிகளை கொண்ட குஜராத் சட்டசபைக்கு 2 கட்டங்களாக டிசம்பர் 9 மற்றும் 14-ந் தேதிகளில் தேர்தல் நடக்கிறது.
ஆளும் பாரதிய ஜனதா ஆட்சியை தக்க வைத்துக் கொள்ள போராடி வருகிறது. இதற்காக அந்த கட்சியின் தலைவர்கள் தீவிரமாக பிரசாரம் செய்து வருகிறார்கள். பா.ஜனதா நேற்று முன்தினம் 70 தொகுதிக்கான வேட்பாளர் பட்டியலை அறிவித்திருந்தது.
முதல்-மந்திரி விஜய் ரூபானி ராஜ்கோட் மேற்கு தொகுதியிலும், துணை முதல்-மந்திரி நிதின் படேல் மெக்சனா தொகுதியிலும் போட்டியிடுகிறார்கள். 16 மந்திரிகள் உள்பட 49 எம்.எல்.ஏக்களுக்கு மீண்டும் டிக்கெட் கொடுக்கப்பட்டுள்ளது.
இந்த நிலையில் பா.ஜனதா 2-வது வேட்பாளர் பட்டியலை நேற்று இரவு வெளியிட்டது. 36 தொகுதிக்கான வேட்பாளர்கள் அறிவிக்கப்பட்டுள்ளனர்.
இதில் 3 மந்திரிகளுக்கு தேர்தலில் போட்டியிட டிக்கெட் வழங்கப்படவில்லை. நிர்மலா வத்வானி, மங்குபாய் பட்டேல், ஷாம்ஜி சவுகான் ஆகிய மந்திரிகளின் பெயர் வேட்பாளர்கள் பட்டியலில் இடம் பெறவில்லை. 19 புது முகங்களுக்கு வாய்ப்பு கொடுக்கப்பட்டுள்ளது.
பாரதிய ஜனதா இதுவரை 106 தொகுதிகளுக்கு வேட்பாளரை அறிவித்துள்ளது.
