புதுடெல்லி:
ஹிஸ்புல் முஜாகிதீன் தீவிரவாத அமைப்பின் தலைவர் சையத் சலாஹூதீனை சர்வதேச தீவிரவாதியாக அமெரிக்கா கடந்த மாதம் அறிவித்தது.
ஆனால் தாங்கள் தீவிரவாதிகள் இல்லை என்றும், இந்தியாவிடம் இருந்து காஷ்மீர் விடுதலைக்கான தங்கள் போராட்டம் தொடரும் என்றும் சலாஹுதீன் கூறியிருந்தார். அத்துடன், இந்திய பகுதிக்குள் தாக்குதல் நடத்தும் அளவுக்கு தங்கள் அமைப்பிடம் வலிமை இருப்பதாகவும் கூறியிருந்தார். சலாஹூதீனின் இந்த அடாவடி பேச்சுக்கு இந்தியா கடும் கண்டனம் தெரிவித்துள்ளது.
இதுபற்றி மத்திய உள்துறை செய்தித் தொடர்பாளர் அசோக் பிரசாத் கூறுகையில், ‘சலாஹூதீனை எப்போதும் தீவிரவாதியாகவே மத்திய அரசு கூறியிருந்தது. அவரது கருத்துக்களும் அதனை உறுதி செய்துள்ளன. அமெரிக்கா கூறியபடி, சர்வதேச தீவிரவாதி என்ற பதவிக்கு அவர் பொருத்தமானவர்’ என்றார்.
தீவிரவாதிகளுக்கும் பிரிவினைவாதிகளுக்கும் நிதி வழங்குவதற்கு சலாஹூதீன் கருவியாகவும் உள்ளார், தீவிரவாதிகளுக்கு வேறு வகையான உதவியும் செய்கிறார் என்றும் செய்தித் தொடர்பாளர் குறிப்பிட்டார்.
