ஸ்ரீநகர்:
காஷ்மீர் மாநிலம் குப்வாரா மாவட்டத்தில் எல்லைக் கட்டுப்பாடு கோடு அருகே ராணுவ வீரர்கள் முகாம் அமைத்து பாதுகாப்பு மற்றும் சாலைகள் அமைக்கும் பணியில் ஈடுபட்டு வருகின்றனர். இன்று அதிகாலை 4 மணியளவில் முகாமுக்குள் நுழைந்த தீவிரவாதிகள் அங்கிருந்த ராணுவ வீரர்கள் மீது கண்மூடித்தனமாக துப்பாக்கியால் சுட்டு தாக்குதல் நடத்தினர்.
தீவிரவாதிகள் நிகழ்த்திய இந்த திடீர் தாக்குதலில் கேப்டன் உள்ளிட்ட மூன்று ராணுவ வீரர்கள் உயிரிழந்தனர். மேலும், 5-க்கும் மேற்பட்ட வீரர்கள் காயங்களுடன் அருகிலுள்ள ராணுவ மருத்துவ முகாமில் சிகிச்சைக்காக சேர்க்கப்பட்டுள்ளனர்.
ராணுவ வீரர்கள் மீது தாக்குதல் நடத்தியது தொடர்பாக ஜெய்ஸ்-இ-முகம்மது அமைப்பைச் சேர்ந்த இரு தீவிரவாதிகள் இன்று அதிரடியாக சுட்டுக் கொல்லப்பட்டனர். அதிகாலை நேர இருட்டை பயன்படுத்தி முகாமுக்குள் தீவிரவாதிகள் நுழைந்து தாக்குதல் நடத்தியுள்ளதாகவும், அப்பகுதியில் பதுங்கியுள்ள தீவிரவாதிகளை தேடும் பணி தீவிரமாக நடந்து வருவதாகவும் ராணுவ செய்தி தொடர்பாளர் தெரிவித்துள்ளார்.
