திருப்பதியில் தங்க டாலர் விற்பனைக்கு தனிக்கவுண்ட்டர் தொடக்கம்

திருப்பதி:

திருமலை-திருப்பதி தேவஸ்தான அலுவலக பவனில் (சுவேத பவன்) அதிகாரிகள் ஆலோசனைக் கூட்டம் நடந்தது. கூட்டத்தில் திருமலை-திருப்பதி தேவஸ்தான முதன்மைச் செயல் அலுவலர் சாம்பசிவராவ் கலந்து கொண்டு பேசினார்.

அட்சய திருதியை முன்னிட்டு பக்தர்களுக்கு தங்கம், வெள்ளி, தாமிர டாலர்கள் தட்டுப்பாடு இன்றி விற்பனை செய்யப்பட உள்ளது. இதற்காக தேவஸ்தானம் சார்பில் திருமலை, திருப்பதியில் தனிக் கவுண்ட்டர்கள் தொடங்கப்பட்டுள்ளது. திருப்பதியில் உள்ள கபிலேஸ்வரசாமி கோவிலில் நடந்து வரும் என்ஜினீயரிங் பணிகளை விரைந்து முடிக்க வேண்டும்.

திருச்சானூர் பத்மாவதி தாயார் கோவிலில் உள்ள தேரை பராமரிக்க வேண்டும். லட்டு பிரசாதம், அன்னதானம் ஆகியவற்றுக்கு தேவையான நெய், சர்க்கரை ஆகிய பொருட்களை கொள்முதல் செய்து இருப்பு வைத்துக் கொள்ள வேண்டும்.

இவ்வாறு அவர் பேசினார்.