ஸ்ரீநகர்:
ஜம்மு-காஷ்மீர் மாநிலத்தின் அனந்த்நாக் மாவட்டத்தில் உள்ள பாஹல்காம் நகரை ஒட்டியுள்ள அவோரா என்ற கிராமத்தில் சில தீவிரவாதிகள் பதுங்கியிருப்பதாக பாதுகாப்பு படையினருக்கு ரகசிய தகவல் வந்தது.
இதையடுத்து, ஜம்மு-காஷ்மீர் மாநில காவல் துறையின் தீவிரவாத ஒழிப்பு சிறப்பு படையினர் மற்றும் பாதுகாப்பு படையின் மூன்றாவது ராஷ்டரிய ரைபிள்ஸ் வீரர்கள் அந்த இடத்தில் உள்ள ஒரு வீட்டை நேற்று மாலை சுமார் 5 மணியளவில் சுற்றிவளைத்தனர்.
அந்தப் பகுதியை பிறபகுதிகளுடன் இணைக்கும் நாற்புற சாலைகளும் மூடப்பட்டன. பாதுகாப்பு படையினரை கண்டதும் அங்கு பதுங்கியிருந்த தீவிரவாதி துப்பாக்கியால் சுட்டு தாக்குதல் நடத்தினான். பாதுகாப்பு படையினரும் துப்பாக்கிகளால் சுட்டு எதிர்தாக்குதல் நடத்தினர்.
இருதரப்பினருக்கும் இடையில் விடிய, விடிய நடைபெற்ற கடுமையான துப்பாக்கிச் சண்டையில் இன்று காலை மூன்று தீவிரவாதிகள் சுட்டுக் கொல்லப்பட்டனர். சுட்டுக் கொல்லப்பட்டவர்கள் அனைவரும் தடை செய்யப்பட்ட ஹிஸ்புல் முஜாகிதீன் தீவிரவாத இயக்கத்தை சேர்ந்தவர்கள் என்று முதல்கட்ட தகவல் வெளியாகியுள்ளது.
தொடர்ந்து அங்கு துப்பாக்கிச் சண்டை நடைபெற்று வருவதாக பாதுகாப்பு படை வட்டாரங்கள் தெரிவித்துள்ளன.
