தூத்துக்குடி:
தூத்துக்குடி அமுதா நகரில் உள்ள ரெயில்வே தண்டவாளத்தில் இன்று காலை சுமார் 20 வயது மதிக்கத்தக்க வாலிபர் ஒருவர் பிணமாக கிடந்தார். இது குறித்து தகவலறிந்த தூத்துக்குடி ரெயில்வே போலீசார் மற்றும் தென்பாகம் போலீசார் சம்பவ இடத்திற்கு விரைந்து அங்கு உடலை பார்வையிட்டு விசாரணை நடத்தினர்.
விசாரணையில் பிணமாக கிடந்தவர் தூத்துக்குடி சாந்தி நகரை சேர்ந்த கருப்பசாமி மகன் குருமூர்த்தி (வயது 20) என்பதும், லாரி டிரைவராக பணியாற்றியதும் தெரிய வந்தது. இதுகுறித்து தகவல் அறிந்த அவரது குடும்பத்தினர் மற்றும் உறவினர்கள் சம்பவ இடத்திற்கு திரண்டு வந்தனர். அவர்கள் குருமூர்த்தி உடலை பார்த்து கதறி அழுதனர்.
இதையடுத்து போலீசார் குருமூர்த்தி உடலை சம்பவ இடத்தில் இருந்து மீட்டு பிரேத பரிசோதனைக்காக தூத்துக்குடி அரசு ஆஸ்பத்திரிக்கு அனுப்பி வைத்தனர். குருமூர்த்தி ரெயில் முன் பாய்ந்து தற்கொலை செய்து கொண்டாரா? அல்லது வேறு யாரேனும் அவரை அடித்துக்கொலை செய்து விட்டு உடலை ரெயில் தண்டவாளத்தில் வீசி சென்றார்களா? என்பது தெரியவில்லை.
இதுகுறித்து ரெயில்வே போலீசார் வழக்குப்பதிந்து விசாரணை நடத்தி வருகின்றனர். குருமூர்த்திக்கு மது குடிக்கும் பழக்கம் இருந்து வந்ததாக கூறப்படுகிறது. நேற்று இரவும் அவர் பஜார் பகுதியில் குடிபோதையில் நின்றுள்ளார். அப்போது ஏற்பட்ட தகராறில் யாரேனும் அவரை அடித்துக்கொன்று விட்டு திசை திருப்புவதற்காக உடலை தண்டவாளத்தில் வீசி சென்றிருக்கலாம்? என போலீசார் சந்தேகிக்கின்றனர்.
எனவே அந்த கோணத்திலும் போலீசார் விசாரணை நடத்துகின்றனர். லாரி டிரைவர் ரெயில் தண்டவாளத்தில் பிணமாக கிடந்த சம்பவம் தூத்துக்குடியில் பரபரப்பை ஏற்படுத்தி உள்ளது.
