சென்னை:
சென்னை ஐகோர்ட்டில் வக்கீல் சூரியபிரகாசம் தாக்கல் செய்த மனுவில், ‘கல்வி சாராத அரசியல் நிகழ்ச்சிகளில் பள்ளி மாணவ-மாணவிகளை அதிகாரிகள் கட்டாயப்படுத்தி பங்கேற்க வைக்கின்றனர். அவர்களுக்கு குடிநீர் மற்றும் கழிப்பிட வசதிகூட செய்துகொடுப்பதில்லை. பெற்றோரிடம் அனுமதி பெறுவதில்லை. இதனால் அவர்கள் மனதளவில் பாதிக்கப்படுகின்றனர். பெற்றோர் குழந்தைகளை கல்வி கற்பதற்கு தான் பள்ளிகளுக்கு அனுப்புகின்றனர். எனவே, அரசியல் நிகழ்ச்சிகளில் பள்ளி மாணவ-மாணவிகளை அழைத்துச் செல்ல தடை விதிக்க வேண்டும்’ என்று கூறப்பட்டிருந்தது.
இந்த மனுவை நேற்று விசாரித்த நீதிபதி கிருபாகரன், இந்த வழக்கு சம்பந்தமாக தமிழக அரசு பதில் அளிக்க உத்தரவிட்டு விசாரணையை அடுத்த மாதம் 6-ந் தேதிக்கு தள்ளிவைத்தார்.
விசாரணையின்போது நீதிபதி, ‘ஆசிரியர்கள் போராட்டத்தின்போது கன்னியாகுமரி மாவட்டத்தில் பள்ளிக்கு வந்த மாணவர்களை சில ஆசிரியர்கள் வலுக்கட்டாயமாக வெளியேற்றினர். ஆசிரியர்களின் இதுபோன்ற நடவடிக்கை கண்டிக்கத்தக்கது. இதில் ஈடுபட்ட ஆசிரியர்கள் மீது கடும் நடவடிக்கை எடுக்க வேண்டும்’ என்று கருத்து தெரிவித்தார்.
