பல்லடத்தில் கணவரை பிரிந்து வாலிபருடன் வாழ்ந்த இளம்பெண் திடீர் தற்கொலை

பல்லடம்:

கோவை சூலூர் அய்யம்பாளையத்தை சேர்ந்தவர் பிரகாஷ். இவரது மனைவி ஹேமலதா (வயது 26). இவர்களுக்கு 14 வயதில் மகன் உள்ளார்.

இந்தநிலையில் ஹேமலதாவுக்கும், பிரகாசுக்கும் இடையே கடந்த சில வருடங்களுக்கு முன்பு கருத்துவேறுபாடு ஏற்பட்டது. இதில் கோபமடைந்த ஹேமலதா தனது மகனை அழைத்துக்கொண்டு கணவரை பிரிந்து சென்று விட்டார்.

ஹேமலதா பல்லடத்தில் தங்கி அங்குள்ள செல்போன் கடைக்கு வேலைக்கு சென்று வந்தார். அப்போது கலையரசன் என்ற வாலிபருடன் பழக்கம் ஏற்பட்டது. இருவரும் கணவன்- மனைவி போன்று வாழ்ந்து வந்தனர்.

இந்தநிலையில் நேற்று கலையரசன் வெளியே சென்று விட்டு வீட்டுக்கு வந்தார். அப்போது வீடு உள்பக்கம் தாழ்போடப்பட்டிருந்தது. கதவை தட்டிப்பார்த்தார். ஆனால் திறக்கவில்லை.

சந்தேகமடைந்த கலையரசன் ஜன்னல் வழியே எட்டிப்பார்த்தார். அப்போது ஹேமலதா தூக்கில் பிணமாக தொங்கினார். இது குறித்து பல்லடம் போலீசாருக்கு தகவல் தெரிவிக்கப்பட்டது.

அவர்கள் ஹேமலதாவின் உடலை மீட்டு பிரேத பரிசோதனைக்காக பல்லடம் அரசு ஆஸ்பத்திரிக்கு அனுப்பி வைத்தனர்.

இது குறித்து வழக்குப்பதிவு செய்த போலீசார் ஹேமலதா தற்கொலை செய்து கொண்டதற்கான காரணம் குறித்து விசாரணை நடத்தி வருகிறார்கள்.