எம்.ஜி.ஆர். சிலைக்கு 17-ந்தேதி சசிகலா மாலை அணிவிக்கிறார்

சென்னை:

அ.தி.மு.க. தலைமைக் கழகம் வெளியிட்டுள்ள செய்தி குறிப்பில் கூறி இருப்பதாவது:-

அ.தி.மு.க. நிறுவனத் தலைவர் எம்.ஜி.ஆரின் 100-வது ஆண்டு பிறந்த நாளான 17-ந்தேதி (செவ்வாய்க் கிழமை) காலை 10.45 மணிக்கு அ.தி.மு.க. தலைமைக் கழக வளாகத்தில் அமைந்துள்ள எம்.ஜி.ஆர். சிலைக்கு அ.தி.மு.க. பொதுச் செயலாளர் சசிகலா மாலை அணிவித்து மரியாதை செலுத்தி, எம்.ஜி.ஆரின் 100-வது ஆண்டு பிறந்த நாள் விழா சிறப்பு மலரை வெளியிட உள்ளார்.

அதனைத் தொடர்ந்து கழக அண்ணா தொழிற்சங்கத்தைச் சேர்ந்த 104 நலிந்த தொழிலாளர்களுக்கு தலா 1,00,000 ரூபாய் வீதம், மொத்தம் 1 கோடியே 4 லட்சம் ரூபாய் குடும்பநல நிதியுதவி வழங்க உள்ளார்.

இந்த நிகழ்ச்சியில், தலைமைக் கழக நிர்வாகிகள், அமைச்சர்கள், மாவட்டக் கழகச் செயலாளர்கள், பல்வேறு அமைப்புகளைச் சேர்ந்த நிர்வாகிகள் பெருந்திரளாகக் கலந்து கொள்வார்கள்.

இவ்வாறு அதில் கூறப்பட்டுள்ளது.