search icon
என் மலர்tooltip icon

    லைஃப்ஸ்டைல்

    உடல் பருமனும், பருத்த வயிறும் ஏற்படுத்தும் பாதிப்புகள்
    X

    உடல் பருமனும், பருத்த வயிறும் ஏற்படுத்தும் பாதிப்புகள்

    அப்படியிருக்க உடல் பருமனும், பருத்த வயிறும் எத்தனை பாதிப்புகளை ஏற்படுத்தும் என்பதையும் அதற்கான காரணத்தையும் கீழே பார்க்கலாம்.
    சாதாரண அளவு எடையுள்ள மக்கள் கூட வயிறு பெருத்து இருக்கின்றனர். அப்படி இருந்தாலும் இருதய நோய் பாதிப்பு அபாயம் இருக்கத்தான் செய்யும். அப்படியிருக்க உடல் பருமனும், பருத்த வயிறும் எத்தனை பாதிப்புகளை ஏற்படுத்தும் நினைத்து பாருங்கள்.
    இதற்கான காரணங்கள்:

    * பலர் அவர்கள் அறியாமலேயே நிறைய சர்க்கரையினை உணவில் எடுத்துக் கொள்கின்றனர். கேக்குகள், மிட்டாய்கள், சோடா, பானம் என அதிகம் எடுத்துக் கொள்ளும் பொழுது ஃப்ரக்டோஸ் பிரிவு அதிகம் உடலில் சேருகின்றது. 25 சதவீத வயிற்றுப் பருமன் உடையோர் இதன் காரணத்தினாலே இத்தகைய பாதிப்பினை அடைகின்றனர்.

    * ஆல்கஹால்: இதனை அளவோடு எடுத்துக் கொள்பவர் என்பது மிக மிக குறைவு. இதனால் உடல் பாதிப்பு அடைந்தவர்களும், கல்லீரல் பாதிப்பு அடைந்தவர்களும் தான் அதிகம். மது அருந்துபவர்களுக்கு அதிக நோய்களும் பருத்த வயிறும் ஏற்படுகின்றது.

    * சதா எதையாவது சாப்பிட்டுக் கொண்டே இருப்பவர்கள், கெட்ட கொழுப்பு நிறைந்த உணவுகளை சாப்பிடுபவர்களுக்கு கொழுப்பு வயிற்றுப் பகுதியில் ஏறும்.

    * சுறுசுறுப்பாக இல்லாது பல மணி நேரம் உட்கார்ந்தே நாளை கடத்துபவர்களுக்கும் தொப்பை ஏற்படும்.

    * புரத உணவு குறையும் பொழுது அல்லது புரத உணவு அதிகம் எடுத்துக் கொள்ளாதவர்களுக்கும் பருத்த வயிறு ஏற்படும். குறைந்த புரதம் அதிக பசியினை ஏற்படுத்தும். இதன் காரணமாகவே அதிக உணவு உட்கொள்ளுதலும், வயிறு பருத்தலும் ஏற்படும்.

    * மாத விடாய் நிற்கும் காலத்தில் ஈஸ்டிரஜன் ஹார்மோன் அளவு குறையும் காரணத்தினால் தொடை, இடுப்பு பகுதிகளில் சேரும் கொழுப்பு வயிற்றுப் பகுதியில் சேர ஆரம்பித்து விடுகின்றது. சிலருக்கு இது பரம்பரை காரணமாகவும் இருக்கலாம்.

    * நமது குடலில் நூறு வகையான பாக்டீரியாக்கள் இருக்கும். பல நமக்கு நன்மை பயக்கும். பல நமக்கு தீமை பயக்கும். இவற்றின் சமநிலை மாறும் பொழுது தீய பாக்டீரியாக்களால் உடலின் நோய் எதிர்ப்பு சக்தி குறையும். நீரிழிவு, இருதய, புற்றுநோய் பாதிப்புகள் ஏற்படும் வாய்ப்புகள் கூடும். எடை கூடுவதும், வயிறு பெருப்பதும் ஏற்படும்.

    * பழ ஜூஸில் நீங்கள் சர்க்கரை சேர்க்கா விட்டால் கூட அதிக சர்க்கரை உள்ளது. அதிக கலோரி சத்தும் கூடுகின்றது. இது வயிற்று கொழுப்பினை கூட்டி விடுகின்றது.

    * அதிக ஸ்டிரெஸ் உடையோருக்கு கார்டிசால் ஹார்மோன் கூடுவதன் காரணமாக வயிற்று பருமன் கூடுகின்றது. பருத்த இடுப்பு, தொடை உடைய பெண்களுக்கு இவ்வாறு அதிகம் நிகழ்கின்றது.

    * நார்சத்து இல்லாத உணவு வயிற்று பருமனை கூட்டும்.

    * பரம்பரை காரணமாக வயிறு பருக்கும்.

    * போதுமான அளவு தூக்கம் இல்லாதவர்களுக்கு எடை கூடுதலும், வயிறு பருத்தலும் ஏற்படும்.

    * ஆப்பிளை போல வயிறு பகுதி, தொடை, இடுப்பு பகுதி பருத்து இருப்பது அவர்களின் அன்றாட வாழ்க்கையினை சங்கடமாக்கி விடும்.

    * ஒல்லியாக இருந்தாலும் சிலருக்கு வயிறு மட்டும் பருத்து இருப்பது ஆரோக்கிய மற்றதனையே குறிக்கும்.

    விஞ்ஞான ரீதியாக பருத்த வயிற்றினை குறைக்கும் வழி முறைகள் :

    * நார்சத்து உணவினை அதிகம் எடுத்துக் கொள்ளுங்கள்.

    * அதிக கொழுப்புகள் நிறைந்த உணவுகளை தவிர்த்து விடுங்கள்.

    * மது பழக்கம் வேண்டாமே.

    * புரதம் நிறைந்த உணவு அவசியம்.

    * மனஉளைச்சலை தவிருங்கள்.

    * அதிக சர்க்கரை உணவுகள், இனிப்புகளை சாப்பிடாதீர்கள்.

    * ஏரோபிக் வகையான உடற்பயிற்சியும், யோகாவும் வயிறு பருமன் குறைய வெகுவாய் உதவுகின்றது.

    * மைதா, பாலிஷ் செய்யப்பட்ட அரிசி இவைகளை அடியோடு தவிருங்கள்.

    * சிறிதளவு தேங்காய் எண்ணையினை உங்கள் சமையலில் சேர்த்துக் கொள்ளுங்கள். 30 மி.லி. வரை எடுத்துக் கொள்ளுங்கள். இது கொழுப்பினை வேகமாய் கரைக்கின்றது. ஆனால் மற்ற கொழுப்பு எண்ணைகளை இதனோடு சேர்த்துக் கொள்ளாதீர்கள். ஏனெனில் தேங்காய் எண்ணையே அதிக கலோரி சத்து கொண்டது.

    * பயிற்சியாளரின் ஆலோசனையோடு எடை தூக்கும் பயிற்சியினை செய்யுங்கள்.

    * சோடா மற்றும் புட்டியில் அடைக்கப்பட்ட பானங்களை அடியோடு தவிருங்கள்.

    * நன்கு ஓய்வெடுங்கள். எட்டு மணி நேரம் தூங்குங்கள்.

    * பழ ஜூஸ்கள் வேண்டாம். பழங்களை வெட்டிச் சாப்பிடுங்கள்.

    * ஆப்பிள் சிடார் வினிகரை சாலட் கலவையில் சேர்த்துக் கொள்ளுங்கள்.

    * அவ்வப்போது ஒரு வேளை உண்ணாவிரதம் இருங்கள்.

    * க்ரீன் டீ பருகுங்கள்.

    ஆக இதனை வயது கூடுவதன் இயற்கையான நிகழ்வு என்று விட்டு விடாதீர்கள். உங்கள் உள் உறுப்புகளை சுற்றியும் சிறிது கொழுப்பு இருப்பது இயற்கைதான். அது அந்த உறுப்புக்கு குஷன் போன்ற ஒரு பாதுகாப்பினைத் தரும். ஆனால் அதிகம் இருப்பது கையோடு நோய்களை அழைத்து வந்து விடும். மார்பக புற்று நோய், பித்தப்பை அறுவை சிகிச்சை இவை கூட உள் கொழுப்பினால் ஏற்படும் பிரச்சினைகளே. இரண்டு விரல்களால் அழுந்த பிடிக்கும் பொழுது அதிக சதை இருந்தாலே நல்லதல்ல எனும் பொழுது மிக அதிக அளவில் இடுப்பு, தொடை, வயிறு பகுதிகளில் பெருத்து இருப்பது பல வகை தீங்கினை உடலுக்கு விளை விக்கும் என ஆய்வாளர்கள் கூறுகின்றனர்.

    பட்டையினை அன்றாடம் உணவில் ஏதாவது ஒரு முறையில் 2-3 கி அளவு சேர்த்து வர கடுமையான பருத்த வயிறும், எடையும் குறைகின்றது என ஆய்வுகள் கூறுகின்றன.

    * எலுமிச்சை ஜூஸ் (சர்க்கரை இல்லாமல்), எலுமிச்சை கலந்த நீர் இவை பொதுவில் எடை குறைப்பிற்கு வெகுவாய் உதவுபவை.
    கவலை, பயம், அதிக பேச்சு காரணமாக அதிகமான காற்றை விழுங்கி விடுகின்றோம். கொஞ்சம் உணவு, கொஞ்சம் தண்ணீர் என்று உண்ணும் பழக்கம் உடையவருக்கு வயிற்றில் அதிக காற்று உண்டாகின்றது. உணவு உண்டு சிறிது நீர் குடியுங்கள். சற்று நேரம் சென்று தேவையான தண்ணீர் குடியுங்கள்.

    கீழ்கண்ட வழி முறைகள் கடைபிடிக்க எளிமையானவை. உடனடி பலன் அளிப்பவை. முயற்சி செய்து பார்க்கலாமே.

    * ஸ்வீட், ஐஸ்க்ரீம், நொறுக்குத்தீனி, அதிக கொழுப்பு, அதிக அசைவம் இவற்றை நிறுத்தி விடுவோமே.

    * சாதத்தில் உப்பு, ஊறுகாய், வத்தல், சிப்ஸ் இவற்றினை வீட்டில் காணாத படி செய்து விடுவோம்.

    * நீர் சத்து நிறைந்த பழங்கள், பல வண்ண காய்கறிகளை அன்றாடம் அடிக்கடி எடுத்துக் கொள்வோம்.

    * வீட்டில் எடை மிஷின் ஒன்று வாங்கி விடுங்கள். தினமும் எடையை செக் செய்யுங்கள். உங்களை சரியான எடைக்கு கொண்டு வந்து விடுங்கள். 100 கிராம் கூட கூடாத அளவு உங்களிடம் நீங்களே கண்டிப்பாய் இருங்கள்.

    * கைக்குத்தல் அரிசி, முழு தானிய உணவு, சிறு தானியங்கள், ஓட்ஸ் ஆகியவை நம் அன்றாட உணவாகட்டும். நார்சத்து அதிகம் சேர்த்துக் கொள்வோம் என்பதே இதன் பொருள்.

    * அசைவ உணவு உட்கொள்பவர்கள் வாரம் இருமுறை மீன் எடுத்துக் கொள்ளலாம். சைவ உணவு உட்கொள்பவர்கள் ப்ளாக்ஸ் விதை, வால் நட் எடுத்துக் கொள்ளலாம். இது உடலுக்கு அவசியமான ஓமேகா 3 அளிக்க வல்லது.

    * காபி, டீ, அடிக்கடி குடிப்பது தவறு. அதில் அதிக சர்க்கரையும் சேருவதால் உடல் நல பாதிப்பு கூடி விடும். எனவே இவற்றினை அளவு படுத்திக் கொள்ளுங்கள்.

    பெரிய தட்டு, அதிக அளவு உணவு இவை இரண்டும் வேண்டாம். தட்டு சிறியதாக இருந்தாலே உணவின் அளவு குறையும்.
    நாம் என்ன உட்கொள்கிறோம் என்பதில் நீங்கள் கொடுக்கும் கவனம் உங்கள் உடலுக்கு நீங்கள் தரும் மரியாதை.
    பூண்டு, வெங்காயம், கொட்டைகள், ஆரஞ்சு இவை உங்கள் உணவில் அவசியம் தேவை.

    * ஏதாவது ஒரு உடற்பயிற்சி செய்யுங்கள். மற்றும் பகல் பொழுது ஒரு மணிக்கு ஒரு முறை நடந்து கொண்டே இருங்கள்.

    * புகை பிடிப்பதை உடனடியாக நிறுத்துங்கள்.

    * வெளியில் உண்பதை வெகுவாய் குறையுங்கள்.

    * இன்று இந்த உணவு என அட்டவணையை படுத்தி அதன் படி பொருட்கள் காய்கறிகளை வாங்குங்கள்.
    Next Story
    ×