நெல்லையப்பர் கோவிலில் தைப்பூச விழா தொடங்கியது

நெல்லை நெல்லையப்பர் கோவிலில் நடைபெறும் திருவிழாக்களில் தைப்பூச திருவிழாவும் முக்கியமானது. இந்த ஆண்டுக்கான தைப்பூச திருவிழா நேற்று காலையில் சிறப்பு பூஜையுடன் தொடங்கியது. 

கும்பாபிஷேகம் நடைபெறுவதையொட்டி கோவிலில் பாலாலயம் செய்யப்பட்டு உள்ளதால் கொடியேற்றம் நடக்கவில்லை. 4-ம் திருவிழாவான வருகிற 25-ந்தேதி (வியாழக்கிழமை) மதியம் 12 மணிக்கு நடைபெறக்கூடிய நெல்லுக்கு வேலியிட்ட திருவிளையாடல் வைபவமும் கிடையாது. ஆனால் சுவாமி, அம்பாளுக்கு சிறப்பு அபிஷேக அலங்கார தீபாராதனை நடக்கிறது. 

31-ந்தேதி தைப்பூச திருவிழாவன்று தீர்த்தவாரி திருவிழா சுவாமி, அம்பாள் இருப்பிடத்தில் வைத்தே அபிஷேகமும், அலங்கார தீபாராதனையும் நடக்கிறது. 1-ந்தேதி சவுந்திரசபா மண்டபத்தில் நடைபெறக்கூடிய நடராஜர் திருநடன காட்சி கிடையாது. ஆனால், சுவாமி, அம்பாளுக்கு இருப்பிடத்தில் வைத்தே அபிஷேகமும், அலங்கார தீபாராதனையும் நடக்கிறது.