ராகு பகவான் சிம்மராசியில் இருந்து கடக ராசிக்கும், கேது பகவான் கும்பராசியில் இருந்து மகர ராசிக்கும் இடம்பெயரும் பெயர்ச்சி விழா நேற்று நடந்தது. ராகுவுக்கும், கேதுவுக்கும் பரிகார தலமாக விளங்கும் நாகர்கோவில் நாகராஜா கோவிலில் ராகு- கேது பெயர்ச்சி விழா நேற்று நடைபெற்றது.
இதையொட்டி நேற்று காலை 11 மணி அளவில் ராகு- கேது பரிகார சிறப்பு அபிஷேகம் நடைபெற்றது. மதியம் 12.30 மணிக்கு பாரிகார சிறப்பு பூஜையும், 12.50 மணிக்கு தீபாராதனையும் நடைபெற்றது.
இதையொட்டி நேற்று காலையில் இருந்து நாகராஜா கோவிலுக்கு குடும்பம், குடும்பமாக பக்தர்கள் ஏராளமானோர் வந்து ராகு- கேதுவுக்கு பரிகார பூஜை மற்றும் அபிஷேகம் செய்தனர். மேஷம், மிதுனம், கடகம், சிம்மம், துலாம், தனுசு, மகர ராசிக்காரர்கள் பரிகாரங்கள் செய்தனர்.
மேலும் ராகு- கேது பெயர்ச்சியையொட்டி நாகராஜா கோவிலில் சிறப்பு பரிகார அபிஷேக அர்ச்சனை செய்யக்கூடியவர்களுக்கு கட்டணமாக நாகராஜா கோவிலில் ரூ.300 வசூலிக்கப்பட்டது. பரிகார அபிஷேக அர்ச்சனை டிக்கெட் வாங்கி பங்கேற்றவர்களுக்கு பிரசாதமாக தேங்காய்- பழத்தட்டு வழங்கப்பட்டன. நேற்று மட்டும் சுமார் 350 பேர் பரிகார அபிஷேக அர்ச்சனை டிக்கெட் வாங்கி பரிகார பூஜையில் பங்கேற்றதாக கோவில் நிர்வாகிகள் தெரிவித்தனர்.
ராகு- கேது பெயர்ச்சி விழா ஏற்பாடுகளை இந்து சமய அறநிலையத்துறை இணை ஆணையர் பா.பாரதி, கண்காணிப்பாளர் சிவகுமார், நாகராஜா கோவில் மேலாளர் செந்தில்குமார் ஆகியோர் செய்திருந்தனர். கோவிலில் செய்யப்பட்டிருந்த ஏற்பாடுகளை இணை ஆணையர் பாரதி நேற்று நேரடியாக பார்வையிட்டார்.
