நெல்லை சந்திப்பு குறுத்துத்றையில் தாமிரபரணி ஆற்றங்கரையில் திருவாவடுதுறை ஆதீனத்துக்கு சொந்தமான சுப்பிரமணிய சுவாமி கோவில் உள்ளது. இந்த கோவிலில் ஆண்டுதோறும் சித்திரை திருவிழா 10 நாட்கள் நடைபெறும். இந்த ஆண்டுக்கான திருவிழா இன்று(சனிக்கிழமை) கொடியேற்றத்துடன் தொடங்குகிறது.
இதையொட்டி சுப்பிரமணிய கோவிலில் அதிகாலை 5 மணிக்கு சுவாமி-அம்பாளுக்கு சிறப்பு அபிஷேக, அலங்கார தீபாராதனையும், சிறப்பு பூஜையும் நடக்கிறது. காலை 10.30 மணிக்கு கொடியேற்றம் நடக்கிறது.
விழா நாட்களில் சுவாமி, அம்பாளுக்கு சிறப்பு பூஜைகள், அலங்கார தீபாராதனையும், மாலையில் சுவாமி, அம்பாள் வீதி உலாவும் நடக்கிறது. வருகிற 5-ந் தேதி அதிகாலை 5 மணிக்கு ஆறுமுகருக்கு உருகு சட்டசேவையும், சுவாமி தண்டியல் பல்லக்கில் வீதி உலாவும் நடக்கிறது.
இதைத்தொடர்ந்து வெற்றிவேர் சப்பரத்தில் ஆறுமுகபெருமான் எழுந்தருளலும், சிறப்பு நீராட்டு வழிபாடும் நடக்கிறது. இரவு 7 மணிக்கு தங்க சப்பரத்தில் சிகப்பு சாத்தி உருத்திரன் காட்சியில் சுவாமி நெல்லை டவுனுக்கு எழுந்தருளல் நடக்கிறது. 6-ந் தேதி காலை 7 மணிக்கு வெள்ளை சாத்தி நான்முகன் காட்சியிலும், இரவு 7 மணிக்கு பச்சை சாத்தி திருமால் காட்சியிலும் சுவாமி எழுந்தருளல் நடக்கிறது. 7-ந்தேதி காலையில் தண்டியல் பல்லக்கிலும், இரவில் திருக்கயிலாய வாகனத்திலும் வீதி உலா நடக்கிறது.
விழாவின் சிகர நிகழ்ச்சியான தேரோட்டம் வருகிற 8-ந் தேதி(திங்கட்கிழமை) காலை 6 மணிக்கு நடக்கிறது. மறுநாள்(9-ந் தேதி) காலை 10.30 மணிக்கு தீர்த்தவாரி நடக்கிறது.
இதற்கான ஏற்பாடுகளை குறுக்குத்துறை சுப்பிரமணிய கோவில் நிர்வாகிகள் செய்து இருந்தனர்.
