பூலோக வைகுண்டம் எனப்படும் ஸ்ரீரங்கம் ரெங்கநாதர் கோவிலில் சித்திரை தேர்த்திருவிழா கடந்த 17-ந் தேதி கொடியேற்றத்துடன் தொடங்கியது. திருவிழாவின் முக்கிய நிகழ்ச்சியாக 25-ந் தேதி தேரோட்டம் நடைபெற்றது. இதில் ஏராளமான பக்தர்கள் கலந்து கொண்டனர்.
26-ந் தேதி காலை நம்பெருமாள் கண்ணாடி அறையில் இருந்து புறப்பட்டு 7 மணிக்கு சந்தனு மண்டபத்தை வந்தடைந்தார். 11 மணி முதல் 1 மணிவரை அங்கு திருமஞ்சனம் கண்டருளினார். மாலை 6 மணிக்கு சந்தனு மண்டபத்தில் இருந்து புறப்பட்ட நம்பெருமாள் சித்திரை வீதிகளில் வலம் வந்து பக்தர்களுக்கு காட்சியளித்தார்.
இரவு 8.45 மணிக்கு மூலஸ்தானத்தை சென்றடைந்தார். இரவு 9.30 மணிக்கு தங்க கொடிமரத்தில் சித்திரை தேர் விழாவின் கொடியிறக்கம் நடைபெற்றது. நேற்று மாலை 3 மணியளவில் நம்பெருமாள் மூலஸ்தானத்தில் இருந்து புறப்பட்டு 3.30 மணிக்கு கருட மண்டபம் வந்தடைந்தார். பின்னர் அங்கிருந்து 7 மணிக்கு புறப்பட்டு 7.30 மணிக்கு வாகன மண்டபம் சென்றடைந்தார்.
இரவு 8 மணிக்கு வாகன மண்டபத்தில் இருந்து ஆளும் பல்லக்கில் புறப்பட்டு சித்திரை வீதிகளில் உலா வந்து இரவு 9 மணிக்கு வாகன மண்டபம் சேர்ந்தார். இரவு 9.30 மணிக்கு அங்கிருந்து புறப்பட்டு இரவு 9.45 மணிக்கு மூலஸ்தானம் சென்றடைந்தார். இத்துடன் சித்திரை திருவிழா நிறைவு பெற்றது.
