கேரள மாநிலம் ஆலப்புழை மாவட்டத்தில் தூய ஜார்ஜியார் திருத்தலம் உள்ளது. இங்கு ஆண்டுதோறும் நடைபெறும் திருவிழாவில் குமரி மாவட்டம் மற்றும் தமிழகத்தின் பல பகுதிகளில் இருந்தும் ஏராளமான தமிழர்கள் கலந்து கொள்வார்கள். இந்த ஆண்டுக்கான திருவிழா நேற்று கொடியேற்றத்துடன் தொடங்கியது.
திருத்தல அதிபர் அருட்பணியாளர் ஜான் மனக்குந்நேல் கொடியேற்றி வைத்தார். சங்கனாசேரி உயர் மறைமாவட்ட துணை ஆயர் தாமஸ் தரயில் திருவிழா தொடக்க திருப்பலி நிறைவேற்றினார். தொடர்ந்து, குழித்துறை மறைமாவட்ட தேனருவி சமூகத்தொடர்பு இயக்குனர் அருட்பணியாளர் டேவிட் மைக்கேல் தமிழில் திருப்பலி நிறைவேற்றினார்.
கொடியேற்றம் நிகழ்ச்சியில் ஆலப்புழை மாவட்ட கலெக்டர், கேரள அமைச்சர்கள், சட்டமன்ற மற்றும் நாடாளுமன்ற உறுப்பினர்கள் உள்பட ஏராளமானோர் கலந்து கொண்டனர்.
விழா நாட்களில் தினமும் தமிழில் திருப்பலி, மறையுரை போன்றவை நடைபெறும். இதில், தமிழக ஆயர்கள் பீட்டர் ரெமிஜியூஸ், ஜார்ஜ் மார் ராஜேந்திரன், வின்சென்ட் மார் பவுலோஸ் உள்பட பலர் கலந்து கொள்கிறார்கள். விழா நாட்களில் தமிழ் வழிபாடுகளை நடத்த திருத்தல தமிழ் விழாக்குழு ஒருங்கிணைப்பாளர் அருட்பணியாளர் டேவிட் மைக்கேல் தலைமையில் அருட்பணியாளர் ஹிலரி, சின்னப்பன், மார்ட்டின், சிங்கராயன் ஆகியோர் செய்துள்ளனர்.
