மிராக்கிள் பிக்சர்ஸ் சார்பில் ஏஞ்சலின் டாவின்சி தயாரித்துள்ள படம் ‘நிசப்தம்’. இந்த படத்தில் நாயகனாக புதுமுகம் அஜய், அவருடைய ஜோடியாக அபிநயா ஆகியோர் நடித்திருக்கிறார்கள். பேபி சாதன்யா முக்கிய வேடத்தில் நடிக்கிறார். இவர்களுடன் ஷபிதா ரெட்டி, கிஷோர், இயக்குனர் ஏ.வெங்கடேஷ், பழனி உள்பட பலர் நடித்திருக்கிறார்கள்.
ஷான் ஜேஸீஸ் இசை அமைத்திருக்கிறார். ஒளிப்பதிவு-எஸ்.ஜே.ஸ்டார், எடிட்டர்-லாரன்ஸ், பாடல்கள்-நா.முத்துக்குமார், ஆடியோ கிராப்-யுவராஜ், தயாரிப்பு-ஏஞ்சலின் டாவின்சி, இயக்கம்-மைக்கேல் அருண்.
“இது பெங்களூரில் வாழும் ஒரு தமிழ் குடும்பத்தில் ஏற்படும் நிகழ்வு பற்றிய கதை. இந்த குடும்பத்தில் உள்ள பெண் குழந்தைக்கு ஒரு பாதிப்பு ஏற்படுகிறது. அதற்கு தீர்வு காண சமூகத்தில் உள்ள பல்வேறு பிரிவை சேர்ந்தவர்களும் சேர்ந்து உதவுகிறார்கள்.
ஜாதி-மதத்தை கடந்து அனைவரும் அந்த குழந்தையை மாமூல் வாழ்க்கை வாழ வைக்கிறார்கள். இந்த கதை முழுவதும் இந்த சிறுமியை சுற்றியே வருகிறது. இறுதியில் அந்த குழந்தை எடுக்கும் முடிவு உச்சக்கட்டம்.
அஜய்-அபிநயா இருவரும் காதல் வாழ்க்கை, கணவன்-மனைவி, ஒரு குழந்தையின் பெற்றோர் என்று முப்பரிமாணத்தில் நடித்திருக்கிறார்கள். அபிநயா, பேபி சாதன்யா நடிப்பு அற்புதம். இந்த படத்தின் ஒளிப்பதிவாளர் கே.ஜே.ஸ்டார் என் தம்பி. படம் தயாரித்த ஏஞ்சலின் டாவின்சி என் தங்கை. இது மனிதம், மனித நேயம் ஆகியவற்றை முக்கியப்படுத்தும் வாழ்க்கையை சொல்லும் விழிப்புணர்வு கதை” என்றார்.
