காஞ்சீபுரம்,ஜூலை. 20-

 

காஞ்சீபுரம் சி.எஸ்.ஐ. ஆஸ்பத்திரியில் நிர்வாகத்தினருக்கும், ஊழியர்களுக்கும் இடையே சில மாதங்களாக பிரச்சினை இருந்து வருகிறது.இந்நிலையில் நிர்வாகத்தில் உள்ள ஒருவர் நர்சாக பணிபுரியும் ஜாக்குலின் ஜானட் என்பவருக்கு நெருக்கடி கொடுத்து மிரட்டல் விடுத்ததாக தெரிகிறது.

 

இதனால் மனவேதனை அடைந்த ஜாக்குலின் நேற்று முன்தினம் தூக்க மாத்திரை சாப்பிட்டு தற்கொலைக்கு முயன்றார். அவரை அக்கம் பக்கத்தினர் மீட்டு வேறொரு தனியார் ஆஸ்பத்திரியில் சேர்த்தனர். அங்கு அவருக்கு சிகிச்சை அளிக்கப்பட்டு வருகிறது. அவர் எழுதி வைத்திருந்த கடிதத்தில் ஆஸ்பத்திரியில் ஊழியர் ஒருவர் ஏற்படுத்திய மனஉளைச்சலினால் தற்கொலை செய்து கொள்கிறேன் என்று குறிப்பிட்டு இருந்தார்.

 

இதற்கிடையே நர்சு தற்கொலைக்கு முயன்ற சம்பவம் குறித்து அறிந்ததும் ஆஸ்பத்திரியில் பணிபுரியும் நர்சுகள், ஊழியர்கள் மற்றும் ஜாக்குலினின் உறவினர்கள் ஆஸ்பத்திரி முன்பு சாலையில் மறியலில் ஈடுபட்டனர்.

 

தகவல் அறிந்ததும் சிவகாஞ்சி போலீசார் விரைந்து வந்து மறியலில் ஈடுபட்ட 24 பெண்கள் உள்பட 49 பேரை கைது செய்தனர். இது தொடர்பாக விசாரணை நடத்தி வருகிறார்கள்.