பள்ளிக் காலத்திலே அங்குள்ள மாணவிகளுக்கு மேற்கத்திய நடனம் கற்றுக் கொடுக்கும் அளவுக்கு திறமையை வளர்த்துக்கொண்ட பிரவளிகா, அதிக மதிப்பெண் பெற்று தேறி சென்னை எம்.ஓ.பி.வைஷ்ணவா கல்லூரியில் பி.காம். படிக்க சேர்ந்திருக்கிறார்.

"அப்பா பெங்களூரில் தொழில் செய்து வருகிறார். அந்த தொழில்களை நிர்வகிக்க வேண்டும் என்ற ஆசை எனக்கு உண்டு. அதனால்தான் பி.காம். படிக்கச் சேர்ந்தேன். நாம் ஈடுபட்ட தொழிலில் சாதிக்க வேண்டும் என்றால் தோழமை உணர்வோடு சிரிக்கத் தெரிய வேண்டும். மற்றவர்களை உற்சாகப்படுத்தி வேலை வாங்கத் தெரியவேண்டும். அதை எல்லாம் நான் கல்லூரியில் கற்றுக்கொண்டேன்''

 

கல்லூரியில் கிடைத்த தொழில் அனுபவம் எப்படி இருந்தது?

"கல்லூரியில் சில மாணவிகள் சேர்ந்து துணி, வளையல், காதணி, கைவினைப் பொருட்களை வாங்கி மாணவிகளுக்கே விற்போம். அதன் மூலம் பணம் மட்டுமல்ல நிறைய அனுபவங்களும் கிடைத்தன. முதலில் முதலீட்டிற்கு பணம் சேர்ப்பது, சரியான கடையை தேர்ந்தெடுத்து பேரம் பேசி தரமான பொருட்களை வாங்குவது, அவைகளை நல்ல முறையில் விற்பது போன்ற வியாபார நுணுக்கங்களை நான் அப்போதே கற்றுவிட்டேன்''

அதிக சிக்கனவாதிகள் ஆண்களா, பெண்களா?

"பெண்கள்தான்! வீட்டில் எவ்வளவு பணம் கேட்டாலும் காரணம் கேட்காமல் எனக்கு தருவார்கள். அதை கண்டபடி செலவிடவும் நிறைய வழிகள் உள்ளன. ஆனால் நான் குறைந்த அளவே பணம் வாங்குவேன். அதையும் நல்ல வழியில் மட்டுமே சிக்கனமாக செலவிடுவேன். என்னை போலத்தான் இன்றைய இளம்பெண்களில் பலரும் சிக்கனத் திலகங்களாக இருக்கிறார்கள்.''

கல்லூரி படிப்பை தொடரும்போதே பிரவளிகா பரத நாட்டியத்தையும் கற்றுத் தேர்ந்து அரங்கேற்றம் செய்துவிட்டார். ஆனாலும் அதில் தொடர்ந்து பயிற்சி பெறுவதற்காக விடுதி ஒன்றில் தங்கியிருந்து தினமும் பரத நாட்டியத்தில் ஆழ்ந்து போகிறார். இவருடைய குரு: பார்வதி பாலசுப்பிரமணியன்.

பள்ளி, கல்லூரியில் ஒவ்வொரு அனுபவத்தை பெற்றிருக்கும் நீங்கள் தற்போது வசிக்கும் ஹாஸ்டலில் என்ன மாதிரியான அனுபவத்தை பெறுகிறீர்கள்?

"நாங்கள் மூன்று பெண்கள் ஒரே அறையில் தங்கியிருக்கிறோம். படிக்கிறவர்கள், வேலை பார்க்கிறவர்கள் என்று பலதரப்பட்டவர்கள் ஒன்றாக தங்கியிருக்கும்போது அவர்கள் மூலம் கிடைக்கும் அனுபவங்கள் ரொம்பவும் வித்தியாசமாகவும், வாழ்க்கைக்கு அத்தியாவசியமான தாகவும் இருக்கின்றன. பெண்கள் வாழ்க்கையை நன்றாக புரிந்துகொண்டால் மட்டுமே சாதிக்க முடியும்''

பல்வேறு அனுபவங்கள் கிடைத்திருக்கிறதே. காதல் அனுபவம்?

"அந்த அனுபவம் கிடைக்க வேண்டும் என்ற ஆசை எனக்கில்லை''

அடர்த்தியாக கூந்தல் வளர்த்திருக்கிறீர்களே, எப்படி பராமரிக்கிறீர்கள்?

"காற்றில் நிறைய மாசு இருப்பதால் கூந்தலில் நிறைய அழுக்கு சேர்ந்து விடுகிறது. அதனால் தினமும் கூந்தலை கழுவி சுத்தம் செய்வேன். நாட்டியப் பயிற்சி உடலுக்கும், மனதுக்கும் புத்துணர்ச்சி தருவதாலும், சத்துணவுகளை மட்டுமே உண்பதாலும் என் கூந்தல் அடர்த்தியாக வளர்ந்துகொண்டிருக்கிறது''

மூக்குத்தி மீது உங்களுக்கு ஆசை வர என்ன காரணம்?

 

"என் அம்மா மூக்குத்தி அணிந்திருக்கிறார். அந்த அழகு எனக்கு பிடித்திருப்பதால், 15 வயதிலே நான் மூக்குத்தி போட்டுக்கொண்டேன். இப்போது எனக்கான பேஷனாக இது மாறிவிட்டது. என்னைப் பார்த்து பல இளம்பெண்கள் மூக்குத்தி அணிந்திருக்கிறார்கள். பேஷனுக் காக ஒரு கால் விரலில் மெட்டி அணிந்திருந்தேன். திருமணத்திற்கு முன்பு அணியக்கூடாது என்று என் நடனக்குரு சொன்னதால் கழற்றிவிட்டேன்''

மாடலிங் பற்றி?

"முன்பு அதில் அளவு கடந்த ஆர்வம் இருந்தது. இப்போது நடனத்தில் மட்டுமே முழு கவனம் செலுத்துகிறேன். பெங்களூரில் நடனப் பள்ளி தொடங்கவும் திட்டமிட்டிருக்கிறேன்''

பிரவளிகா தமிழ், ஆங்கிலம், கன்னடம், இந்தி, தெலுங்கு ஆகிய ஐந்து மொழிகளில் புலமை பெற்றிருக்கிறார். கார் ஓட்டுவதிலும் கை தேர்ந்தவராக இருக்கிறார்.